Tevgera Ciwanên Şoreşger ya ser bi HSD’ê-PKK’ê ve di revandina zarokan de berdewam e, herî dawî keçeke 13 salî ji Helebê revand.
Jêderên taybet dane zanîn: “Roja Pêncşemê 16ê Mijdarê, çekdarên Ciwanên Şoreşger, Estêr Ehmed ji pêş dibistana Selahedîn ya keçan li taxa Şêx Meqsûd revand, û ta niha çarenivîsa wê ne diyar e”.
Estêr jidayikbûya sala 2009an e û xelka navçeya Raco ya Efrîna Rojavayê Kurdistanê ye.
Di 8ê Mijdarê de, çeteyên PKK’ê “Tevgera Ciwanên Şoreşger” keça 13 salî Sebriya Şiyar Misto, ji Şêx Meqsûd revand, û di 11ê mehê de û piştî fişareke ragihandinî serbest hate berdan.
Di Cotmeha bûrî de, çeteyên PKK’ê 5 zarok li bajarên Heleb û Qamişlo revandine:
– Salîn Mehmûd, 14 salî
– Solîn Ibrahîm, 15 salî
– Mîrav Ednan Xaşo, 15
– Sîmêl Zêdan Ismaîl, 14
– Izedîn Bekrî Ne’san, 12 salî.
Tevî ku Mezlûm Kobanê fermandarê HSD’ê di sala 2019an de, rêkeftinek li gel Vêrcîniya Gamba Nûnera NY bo karûbarên zarokan û leşkerkirina wan îmze kiriye, lê HSD’e di revandina zarokan de berdewam e û bangên kesûkarên wan û çalakvan, siyasetmedar û partiyên Kurdî ji bo bidawîkirina vê diyardeya metrsîdar, piştguh dike.
