Fîdan: Şerê li dijî Îranê binpêkirina hiqûqa navdewletî ye

Wezîrê Derve yê Tirkiyeyê Hakan Fîdan, derbarê rageşiya li Rojhilata Navîn û polîtîkayên Amerîka û Îsraîlê de hişyariyên tund dan. Fîdan diyar kir ku şerê li dijî Îranê binpêkirina hiqûqa navdewletî ye û destnîşan kir ku armanca Îsraîlê ew e ku welatên Îslamî bixe nav pevçûneke demdirêj.

Wezîrê Derve Hakan Fîdan, îro 28ê Adarê di hevpeyvîneke taybet a televîzyonî de rojeva herêmî û navdewletî nirxand. Fîdan bal kişand ser metirsiya belavbûna şer li seranserê navçeyê û ragihand ku Tirkiye ji bo rêgirtina li ber vê felaketê di nav tevgereke dîplomatîk a çalak de ye.

“Şer Bi Awayekî Neyasayî Dest Pê Kiriye”

Fîdan di daxuyaniya xwe de tekez kir ku rawestandina şer ji bo wan di ser her tiştî re ye û wiha got:

“Armanca me ya pêşîn rawestandina şer e. Di heman demê de ji bo me pir girîng e ku em rê li ber firehbûna vî şerî bigirin. Ev şer bi awayekî neyasayî dest pê kiriye û her roj metirsiya mezinbûna wê zêdetir dibe.”

Rola Pakistanê di Navbeynkariyê de

Yek ji xalên herî balkêş ên daxuyaniya Fîdan, eşkere kirina kanala dîplomatîk a di navbera aliyan de bû. Fîdan ragihand ku pêvajoya danûstandinan gihîştiye qonaxeke diyar û got: “Wisa xuya dike ku di danûstandinan de gavek hatiye avêtin. Bi kêmî ve guftûgo dest pê kirine û bi rêya welatê Pakistanê peyam di navbera aliyan de tên guhertin.”

“Senaryoya Îsraîlê û Tova Fitneyê”

Wezîrê Derve yê Tirkiyeyê hişyarî da ku navçey ber bi lîstikeke xeternak ve tê birin ku senaryoya wê ji aliyê Îsraîlê ve hatiye nivîsandin. Fîdan stratejiya Îsraîlê wiha şirove kir:

Pevçûna Navxweyî ya Îslamî: “Îsraîl dixwaze welatên Îslamî bixe nav pevçûneke demdirêj a bi hev re. Çandina tova fitneyê wisa dike ku kombûna careke din a Misilmanan pir zehmet bibe.”

Bandora li ser Amerîkayê: Fîdan rexne li bandora Îsraîlê ya li ser siyaseta Washingtonê girt û diyar kir ku ev ne tenê “teoriya komployê” ye, lê babetekî cidî ye ku ronakbîrên cîhanê jî behsa wê dikin.

Banga li Amerîkayê: Zextê Li Îsraîlê Bikin

Fîdan bal kişand ser bandorên xirab ên vî şerî li ser welatên Kendavê û bang li rêveberiya Amerîkayê kir. Fîdan diyar kir ku heke bi Îranê re peymanek pêk hat, divê Washington zexteke rastîn li ser Îsraîlê bike da ku şer bi dawî bibe.

Di dawiya axaftina xwe de, Fîdan tekez kir ku karê herî pêşîn ê Tirkiyeyê parastina herêmê û dûrxistina welatê xwe ji agirê vê pevçûnê ye.