Berî Lûtkeya NATOyê li Enqereyê operasyonên berfireh: 178 Kes hatin girtin

Li Tirkiyeyê di çarçoveya tedbîrên ewlehiyê yên berî Lûtkeya NATOyê de, operasyonên li dijî gumanbarên “pêwendiya bi rêxistinên terorê” hatin zêdekirin. Serdozgeriya Komarê ya Enqereyê ragihand ku di encama van operasyonên berfireh de 178 kes hatine girtin.

Li gorî daxuyaniya dozgeriyê, ev pêngav beşek e ji plana ewlehiyê ya taybet ku ji bo mazûvaniya lûtkeya bilind a NATOyê hatiye amadekirin. Hat destnîşankirin ku di hefteya dawî de bi giştî 225 gumanbar hatibûn binçavkirin; ji van kesan dadgehê biryara girtina 178 kesan da û 34 kes jî serbest berdan.

MLSA: Di Nav Girtiyan De Rojnamevan û Akademîsyen Hene

Komeleya Lêkolînên Medya û Hiqûqê (MLSA) bal kişand ser nasnameya kesên ku di bin navê “operasyonên ewlehiyê” de hatine girtin. Li gorî daxuyaniya MLSAyê, ev pêla girtinan piranî bandorê li ser derdorên sivîl dike û di nav girtiyan de rojnamevan, akademîsyen, parêzer, endamên sendîkayan, mamoste, xwendekar û aktîvîstên civaka sivîl cih digirin.

Donald Trump Jî Tê Enqereyê

Lûtkeya NATOyê ya ku çavên herêmê û cîhanê li ser e, dê di 7 û 8ê Tîrmeha 2026an de li paytext Enqereyê were lidarxistin. Di vê civîna lûtkeyê ya krîtîk de, tê çaverêkirin ku serokên 32 welatên endamên NATOyê bicivin. Her weha hat piştrastkirin ku Serokê Amerîkayê Donald Trump jî dê di nav rêberên beşdar de be.