Kobanê.. “Ciwanên Şoreşger” malbateke qurbanî kirin armanc û keça wan revandin

Çeteyên PKKê yên bi navê “Ciwanên Şoreşger” keçeke din a Kurd ji bajarê Kobanê revandin û ji bo baregehên leşkerkirina bi zorê veguhestin.

Çavkaniyên “Darka Mazi” yên li Rojavayê Kurdistanê eşkere kirin ku li dawiya meha Adara îsal 2026an, çeteyên PKKê yên “Ciwanên Şoreşger” ku karê wan revandina zarokan e, keçeke 16 salî ji Kobanê revandine û çarenûsa wê nenas e.

Çavkaniyên me diyar kirin ku navê keça hatiye revandin “Zeyneb Mistefa Mihemed Silêman” e û ji rûniştvanên Kobanê ye.

Her wiha destnîşan kirin ku piştî bavê Zeynebê bi berdewamî li pey çarenûsa keça xwe geriyaye, wî li roja 19ê Hezîrana 2026an serdana baregeha “Ciwanên Şoreşger” a li taxa “Kaniya Kurdan” li bajarokê Kobanê kiriye û ji wan xwestiye ku keça wî vegerînin. Lê belê li wir alozî di navbera wî û berpirsên çeteyan de derketiye, piştî ku çeteyan jê re gotiye keça wî Zeyneb ne li cem wan e. Ji ber wê yekê jî çarenûsa Zeynebê heta niha ne diyar e.

Çeteyên “Ciwanên Şoreşger”, wekî bi sedan keç û zarokên ku ji bo PKK û YPGê revandine, keça bi navê Zeyneb jî ji bo binkeyên perwerdeyê û leşkerkirina bi zorê birine.

Ev bûyer di demekê de ye ku malbata Zeynebê qurbaniyên mezin dane; li dawiya meha Çileya îsal, ji ber teqina mayineke çandî li sînorê nahiyeya Eyn Îsayê, xwişka Zeynebê canê xwe ji dest dabû û dayika wê jî bi giranî birîndar bibû û lingekî xwe winda kiribû.

Ev yek jî îsbat dike ku malbatên qurbanî jî dane, ji zilm û sitema rêxistina PKKê û çeteyên wê rizgar nabin.

“Ciwanên Şoreşger” rêxistineke ciwanan a girêdayî PKKê ye, bi rênimayiyên rasterast ên Cemîl Bayîk tevdigere û karê wê yê serekî çekdarkirina zarokan e ji bo PKK û baskên wê yên li Rojavayê Kurdistanê.