Mîthat Sancar: Pêvajoya aştiyê li ser garantiyên hiqûqî ava dibe

Endamê Şandeya Îmraliyê û Parlamenterê DEM Partiyê Mîthat Sancar, derbarê nîqaşên li ser pêvajoya çareseriyê de daxuyaniyên giring dan û ragihand ku misogerkirina aştiyê tenê bi garantiyên hiqûqî û naskirina fermî ya rola Abdullah Ocalan pêkan e.

Sancar di konferansa bi navê “Li Tirkiyeyê Pêvajoya Aşitiya Civakî û Mînakên Dinyayê” de axivî û bal kişand ser giringiya pênasekirina gavan. Sancar diyar kir ku navlêkariya rast bandorê li encamê dike û got: “Ji bo me ev meş, ‘Pêvajoya Aştî û Civaka Demokratîk’ e.” Wî her wiha bikaranîna têgeha “terorê” rexne kir û destnîşan kir ku ev ziman fikarên li ser niyetpakiya dewletê mezin dike.

“Çekberdan bingeha çareseriyê ye”

Mîthat Sancar bal kişand ser banga 27ê Sibatê û diyar kir ku li Tirkiyeyê, berûvajî ezmûnên li cîhanê, qonaxa çekberdanê wekî destpêka pêvajoyê hatiye qebûlkirin da ku bingeha çareseriyê bi awayekî saxlem bê avakirin.

Sancar daxwaz kir ku “Qanûna Çarçoveyê” bi rengekî berfireh û giştgir bê amadekirin û wiha pê de çû:

“Pêvajoyên aştiyê li ser bingeha baweriya kesane ava nabin, bingeha wan garantiyên hiqûqî ne. Divê di yasaya nû de ji bo çekberdan û entegrasyonê mekanîzmayên zelal hebin û mafê siyaseta azad û demokratîk wekî stûna bingehîn a çareseriyê bê parastin.”

“Rola Ocalan a di yasayê de daxwazeke xwezayî ye”

Sancar tekez kir ku kilîta vê pêvajoyê li Îmraliyê ye û rola Abdullah Ocalan wiha nirxand: “Rêya vê pêvajoyê rasterast ji aliyê Birêz Ocalan ve hatiye vekirin. Ji bilî wî tu kesî nikaribû bangeke wiha dîrokî bike ku bandorê li ser biryara koman bike. Ji ber vê yekê, naskirina rola wî di nav qanûnê de daxwazeke li gorî xwezaya kar e û divê ev rol bi fermî bê qebûlkirin.”

Di dawiya gotara xwe de, Parlamenterê DEM Partiyê anî ziman ku heke armanca bingehîn bidawîkirina vî şerê giran be, divê dewlet vê rastiya sîstematîk a danûstandinan û hebûna muxataban qebûl bike.