Sezgin Tanrıkulu banga yasaya çareseriyê kir: Amadekariyên veşartî pêvajoyê di xetereyê de dihêlin

Parlamenterê Diyarbekirê yê Partiya Nû (YENÎ Parti) Sezgin Tanrıkulu, bertek nîşanî xebatên “yasaya çarçoveyê” yên ji bo pêvajoya çareseriyê da û hişyarî da ku mekanîzmayên bêşeffafî û xebatên girtî dibin sedema têkçûna hewldanên aştî û diyalogê.

Di civîneke çapemeniyê de, Tanrıkulu amaje bi wê yekê kir ku reşnivîsa qanûnê li pişt deriyên girtî ji aliyê kadroryên desthilatê ve tê meşandin û ragihand ku partiyên opozîsyonê bi taybetî Partiya Nû di derbarê pêvajoyê de nehatine agahdarkirin. Parlamenterê Kurd destnîşan kir ku tenê hevdîtinên sînorkirî yên bi DEM Partiyê re ji bo lihevkirineke neteweyî û civakî têrê nakin.

Tanrıkulu bal kişand ser asta pisporiyê û ezmûna ekîba ku qanûnê amade dike û diyar kir ku dûrketina ji ders û tecrûbeyên pêvajoyên berê şaşiyeke mezin e. Li gorî dîtina wî, pêşnûmeyeke ku daxwazên hemû aliyan negire ber çavan, çareseriyeke mayînde misoger nake û wê tevlîheviyê li herêmê û siyaseta navxweyî zêdetir bike.

Ji bo derbaskirina krîzê û avakirina aştiyeke rewa, Tanrıkulu paketeke berfireh a reforman pêşniyar kir. Di nav van şertan de azadkirina girtiyên siyasî, afirandina zemîna qanûnî ji bo kesên ku çekên xwe danîne û yên ji ber dozên fikrî hatine darizandin, ligel hêsankirina vegera koçber û mişextiyên diyasporayê cih digirin. Tanrikulu bang kir jî, divê li şûna çarçoveyeke teng, yasayeke ku lihevkirina civakî û aştiya mayînde garantî dike, were pêşkêşkirin.