Serokwezîrê Herêma Kurdistanê Mesrûr Barzanî, îro (15ê Mijdara 2026an), di merasîma destpêkirina qonaxa duyem a Projeya Kembera Kesk a Hewlêrê de gotarek pêşkêş kir. Serokwezîr Barzanî di axaftina xwe de bal kişand ser parastina qewareya Herêma Kurdistanê, giringiya projeyên jîngehî û êrîşa dawî ya li ser Zeviya Kormorê.
Di çarçoveya qonaxa duyem a projeyê de ku bi hevkariya welatê Yûnanistanê tê meşandin, zêdetirî milyonek û 800 hezar şitil tên çandin. Serokwezîr Barzanî diyar kir ku ew ê ji bo başkirina keşûhewayê her tiştî bikin û got ku ev proje ne tenê ji bo jîngehê, di heman demê de ji ber darên berhemdar ji bo warê xwarinê û peydakirina derfetên kar jî girîng e. Wî spasiya hêzên Pêşmerge û xwebexşan kir ku di vê projeyê de cih digirin.
Bandora Projeya “Ronakî” û Paqijkirina Hewa
Barzanî destnîşan kir ku berê ji ber belavbûna jeneratorên ehlî, keşûhewaya Hewlêrê qirêj bûbû, lê bi cîbicîkirina Projeya “Ronakî” re bandoreke erênî ya mezin li ser paqijkirina avûhewaya Hewlêrê û tevahiya Kurdistanê çêbûye. Wî her wiha anî ziman ku di demên borî de hewla birîna daristanên Kurdistanê hatiye dayîn, lê hikûmet ji bo parastina xwezayê bi biryar e.
Helwesta Li Dijî Êrîşa Kormorê û Hewlên Dabeşkirinê
Serokwezîrê Herêma Kurdistanê di axaftina xwe de bi tundî êrîşa li ser Zeviya Kormorê ya Gazê şermezar kir û ew wekî “tawaneke li dijî hemû xelkê Kurdistan û Iraqê” bi nav kir. Barzanî hêvî xwest ku lijneya lêkolînê ya hevpar di zûtirîn dem de encamên lêkolînê eşkere bike û encamderên wê tawanê bigihîjin cezayê xwe yê yasayî.
Di dawiya axaftina xwe de, Mesrûr Barzanî peyamek da ku parastina qewareya Herêma Kurdistanê erkê hemûyan e û wiha got: “Em ê rûbirûyî her hewleke ji bo dabeşkirina Herêma Kurdistanê bibin. Piştrast im her Kurdekî dilsoz û niştimanperwer dê li dijî dabeşkirina zêdetir a Herêma Kurdistanê raweste.” Barzanî da xuyakirin ku tevî hemû astengan, ew ê di xizmetguzarî û cîbicîkirina projeyan de li hemû navçeyên Kurdistanê berdewam bin.
