Ji Herêma Kurdistanê şandeyeke ji rêveber û berpirsên partiyên Komunîst a Kurdistanê û Zehmetkêşên Kurdistanê, li Diyarbekirê serdana DBP’ê, PAK, PSK û hin partî û rêxistinan kirin.
Sekreterê Giştî yê Partiya Komunîst a Kurdistanê Dr. Kawa Mehmûd got; ew dixwazin pirsgirêk bi riya aşitî û demokrasiyê bêne çareserkirin. Hevseroka Giştî ya Partiya Herêmên Demokratîk DBP’ê Salîha Aydenîz jî got; sedema fişarên li ser HDP, DBP û partiyên Kurdistanî tunekirina deskeftiyên kurdan e û li hemberî van zext û fişaran divê kurd zêdetir nêzîkî hevdû bibin.
Piştî zindakînirina Hevserokê Giştî yê Partiya Herêmên Demokratîk (DBP) Keskîn Bayindir û siyasetmedarên BDPê, serok û rêveberên partiyên kurdî serdana DBP’ê dikin û piştgiriya xwe ragihandin. Ji Herêma Kurdistanê jî siyasetmedarên Partiya Komunîst a Kurdistanê û Partiya Zehmetkêşên Kurdistanê serdana DBP’ê kirin. Sekreterê Giştî yê Partiya Komunîst a Kurdistanê Dr. Kawa Mehmûd got; ew dixwazin hemû pirsgirêkên li navçeyê bi riya aşitî û demokrasiyê bêne çareserkirin û ew jî pişgiriya vê yekê dikin.
Sekreterê Giştî yê Partiya Komunîst a Kurdistanê Dr. Kawa Mehmûd ji K24ê re ragihand: “Armanca me ya sereke ew e ku em hemû gavan biavêjin ji bo jinavbirina tundûtûjiyê, wekheviya hemû gel û neteweyan, îstiqrar, da ku geşepêdaneke tam di navbera welat û neteweyan de bê destwerdan di karûbarên dewletên din de û xebata bikin ku aştî li ser asta Rojhilata Navîn pêk were û mayînde be.”
Şandeya partiyên ku ji Herêma Kurdistanê hat Diyarbekirê, serdana Partiya Azadiya Kurdistanê (PAK), Partiya Sosyalîst a Kurdistanê (PSK) û hin partî û rêxistinên din jî kirin û dê beşdarî hin çalakî jî bibin. Hevseroka Giştî ya DBPê Salîha Aydenîz got; piştî zindanîkirina Hevserokê Giştî yê DBPê Keskîn Bayindir serdana partiyên Kurdistanî hêzê dide wan.
Hevseroka Giştî ya DBPê Salîha Aydenîz ji K24ê re ragihand: “Ji 23yê Kanûna 2022an ve li hemberî operasyonan li ser Partiya Herêmên Demokratîk (DBP) di nav partiyan de nêzîkatiyeke gerim bi xwe re anî. Ji beriya me êrişî PAK, PSK û Hereketa Azadî kirin. Mesele ne cudatiya siyaseta kurdan e. Mesele kurdbûn û destkeftiyên Kurdistanê ne, mesele pêşketina azadiya Kurdistanê ye û bi vê ve girêdayî ye, mesele demokrasiya Tirkiye û Rojhilata Navîn e.”
Siyasetmedarên kurd radigihînin ku li her aliyê Kurdistanê li hemberî zext û fişarên dewletên desthilatdar, pêwîstî bi hevkariya partî û rêxistinên kurdan heye û bi vê yekê ew dikarin destkeftiyên xwe biparêzin.
