Şêwirmendê pilebilind ê Serokomarê Tirkiyeyê got: “Tirkiye welatê kurdan e û ev sedsal, sedsala Tirk û Kurdan e.”
Şêwirmendê pilebilind ê Serokomarê Tirkiyeyê, Mehmet Uçum peyamek li hejmara xwe ya tora civakî “X” belav kir û tê de got: “Hemû pêkhateyên welatê me, Tirk, Kurd û yên din jî di nav de, pêkhateyên resen ên Tirkiyeyê ne.”
Mehmet Uçum dibêje: “Kurd beşeke bingehîn a Tirkiyeyê û damezrînerê gelê Tirkiyeyê ye. Ev sedsal, sedsala Tirk û Kurdan e.”
Şêwirmendê Erdogan got jî: “Bîrokeya du neteweyan, xizmeta stratejiya emperyalîstan dike û hewldana parçekirina Tirkiyeyê ye.”
Ev gotinên Uçum piştî wê yekê tên, pêr şandeke DEM Partiyê li Girtîgeha Îmraliyê hevdîtin bi Rêberê PKKê Abdullah Ocalan re kiribû û di dawiyê de Ocalan amadebûna xwe ji bo qonaxeke nû ragihandibû û gotibû: “Ez xwedî wê ezmûn û biryarê me ku piştevanî bidim paradîgmaya nû ya birêz Bahçelî û birêz Erdogan.”
