Wezareta Pêşmerge ragihand, piştî ku şaneyeke razayî ya DAIŞê li Xurmatû li parêzgeha Kerkûk, êrişî çend şivanan kir, hêzên Pêşmerge yekser li navçeyê dest bi tevgerê kirin û karîn şivanan rizgar bikin.
Wezareta Pêşmerge îro 19ê Sibatê di daxuyaniyekê de ragihand, şaneyeke razayî ya DAIŞê li gundên Xurmatû bi taybet derdora gundên Duracî û Xerayê êrişî çend şivanan kir û di encamê de şer û pevçûn di navbera wan de derket.
Wezaretê eşkere kir, piştî haydarbûna hêzên Pêşmergeyên Kurdistanê yên li deverê, EW bilez çûn cihê bûyerê, ji bo rizgarkirina şivan û xelkê deverê û karîn şivanan bi silametî vegerînin deverên wan û terorîst ber bi cihekî nediyar ve reviyan.
Wezareta Pêşmerge dibêje, Pêşmergeyên Kurdistanê dê her dem hişyar bin û bi mêrxasî û destekî pola rûbirûyê hemû liv û tevger û kiryarên terorîstên DAIŞê bibin.
Li gorî agahiyên peyamnêrê K24ê, îro 3 şivan li gundê Duracî yê di navbera Kifrî û Xurmatûyê de, bi hejmarek çekdarên DAIŞê re ketibûn şer.
