Partiya Welatparêzên Kurdistanê (PWK) roja 01.03.2025ê, bi 46emîn salvegera koça dawiyê ya Mele Mistefa Barzanîyê nemir, li Stenbolê konferansa bibîranînê lidar xist.
Buroya Ragehandinê ya di daxuyaniyekê de ragihand, di destpêka konferansê de Sîyasetmedarê kurd, endamê rêvebirîya PWKê ya Stenbolê Abdulmecît Kapazan bixêrhatina beşdaran kir û ji bo şehîdên Kurdistanê rêz hate girtin.
Abdulmecît Kapazan di derbarê armanca konferansê de agahdarî da.
Paşê endamê Komîteya Birevebir a Navendî ya PWKyê Kasim Ergun behsa jîyan, têkoşîn û xebata Mele Mistefa Barzanîyê nemir kir, îro li her çar perçeyên Kurdistanê girîngîya fikir û rêbaza cenabê wî anî zimên. Kasim Ergun, her weha di derbarê pêvajoya ku îro her çar perçeyên Kurdistanê tê de derbas dibin de, bîr û ray û pêşniyarîyên PWKyê pêşkêş kir.
Berpirsê Tevgera Azadî ya Kurdistan Sûrî û Serokê HEZ-KURDê Suphî Ozgen di derbarê rola Mele Mistefa Barzanîyê nemir ya di doza azadîya Kurdistanê de axaftin. Beşdarekî jî helbestek di derbarê Mele Mistefa Barzanîyê nemir de xwend.
Nûnerên Tevgera Azadî ya Kurdistan Sûrî, HEZ-KURD û Platforma Ciwanên Serbixwe, endam û rêvebirên PWKê û sîyasetmedar û rewşenbîrên kurd beşdarî konferansa bibîranînê bûn.
