Bavê keça ku li Kobanê ji aliyê “Ciwanên Şoreşger” ve hatiye revandin, bang li Mezlpm Ebdî dike, eger keça wî heta roja yekem a Cejna Remezanê nekin, dê dawî li jiyana xwe bîne.
Welatiyê ji Kobanê Mihemed Qewas girtevîdyoyek belav kir û tê de dibêje, Rêxistina Ciwanên Şoreşger roja 27ê Adarê keça wî ya tekane revandine û tê de bang li Fermandariya Giştî ya HSDê dike ku keça wî jê re vegerînin.
Mihemed Qewas dibêje: “Keça wî bi rêya hevaleke xwe re nameyek şandiye ku ew dixwaze vegere mala xwe, lê Ciwanên Şoreşger keça wî bernadin.
Herwiha dibêje, ji bilî wê keça wî, ti zarokekî wî yê din nîne û bang li HSD, YPG û YPJê dike ku keça wî vegerînin, eger keça wî heta roja yekem a cejnê azad nekin, ew ê roja yekem a cejnê di demjimêr 12ê nîvro de, li ber pêykera Arîn Mîrkan li bajarê Kobanê, tiştekî bîne serê xwe û ziyanê bigihîne xwe.
Mihemed Qewas di girtevîdyoyeke din de dibêje, navê keça wî Rusêl e û temenê wê 17 salî ye û keça wî li ber deriyê wî li Kobanê hatiye revandin. Herwiha bang li Mezlûm Ebdî û PKKê dike ta ku keça wî vegerînin.
Mihemed Qewas careke din tekez dike, eger keça wî Rusêl heta roja yekem a cejnê venegrînin, ew ê dawî li jiyana xwe bîne.
Tevgera Ciwanên Şoreşger, rêxistinek ser bi Rêveberiya Xweser ve ye û bi mebesta biçekkirina ciwan û zarokan, gelek zarok û ciwanên Kurd li herêmên cuda yên Rojavayê Kurdistanê revandine.
Tevî ku HSDê di Hezîrana 2019an de bi Netewên Yekgirtî re planek ji bo bidawîkirin û qedexekirina tevlîkirina zarokan di nava çekdaran de îmze kiribû. Lê ji dema ku peyman hatiye îmzekirin ve, rewşa revandina zarokan bidawî nebûye.
Malbatên zarokên revandî jî kiryarên Tevgera Ciwanên Şoreşger şermezar dikin û bang li rêxistinên ku girîngiyê didin mafên zarokan, rêxistinên navdewletî û aliyên pêwendîdar dikin ku fişarê li Rêveberiya Xweser û HSDê bikin, ta ku çarenivîsa zarokên wan diyar bikin.
