Îro bi beşdariya zêdetirî 50 partiyên siyasî û beşdarbûna nûnerên civaka sivîl û tevgerên jinan, herwiha bi beşdariya nûnerê Serok Barzanî û ji gelek aliyên cuda nûneran ve Konferansa Yekrêzî û Yekhelwêstî ya Kurdî li Rojavayê Kurdistanê birêve çû û di konferansê de peyama Serok Barzanî ji aliyê nûnerê Serok Barzanî Hemîd Derbendî ve hat xwandin.
Konferans piştî axaftin û gotûbêjan bi dawî bû û encamnameyek ji aliyê Endama Desteya Hevserokatiya PYDê Foza Yusif û Serokê ENKSê Mihemed Îsmaîl ve hat xwandin û konferans bi dawî bû.
Encamnameya Konferansê waha ye:
“Konferansa Yekrêzî û Yekhelwesta Kurdî li Rojavayê Kurdistanê di 26’ê Nîsanê 2025’an de li bajarê Qamişlo piştî diyalogên demdirêj û hewldanên spasdar ji heval û birayan ve, bi beşdariya partiyên Kurdî, rêxistinên civaka sivîl, tevgera jinan, rêxistinên jinan û çalakvanên civaka Kurd ên serbixwe ji herêmên cuda yên Kurdî li Sûriyeyê, bi armanca pejirandina dîtineke yekgirtî ya Kurdî li ser avakirina Sûriyeyek nû û beşdarbûna di teşedana paşeroja wê û çareserkirina pirsgirêka Kurdî de hate lidarxistin. Di vê qonaxa girîng a dîroka Sûriyeyê de, piştî hilweşîna rejîma zordar li Şamê di 8’ê Kanûna Pêşîn a 2024’an de, ev rejîma ku azadî û rûmeta gelê Sûriyeyê bi hemû pêkhateyên wê yên neteweyî, olî û civakî binpê kir û welat li seranserê erdnîgariya Sûriyeyê wêran kir û bi mîlyonan ji gelê wê kuştin, koçber û penaber kirin û her çend gelê Sûriyeyê ji bo hilweşandina wê rêjîmê û bidawîkirina zordariya wê û bidestxistina azadî û rûmeta xwe qurbanî pêşkêş kirin, gelê Kurd li Sûriyeyê jî di rûbirûbûna wê rejîmê de gelek qurbaniyên mezin û bi hezaran şehîdan dan. Gelê Kurd bi dehan salan têkoşîn kir da ku zordariya neteweyî ji ser xwe rake û mafên xwe yên neteweyî bi dest bixe, ji bo avakirina sîstemek demokratîk a piralî li Sûriyê her dem têkoşîna xwe ya neteweyî bi têkoşîna xwe ya niştimanî ve girê da.
Li ser bingeha berpirsiyariya dîrokî û bersivdayîna ji pêdiviyên qonaxa niha, avakirina dîtineke siyasî ya hevbeş a Kurdî ku îradeyeke kolektîf û projeyek rastîn ji bo çareseriyeke dadmend ji bo pirsgirêka Kurdî li Sûriyeyê wekî dewleteke demokratîk û nenavendî nîşan bide.
Beşdaran dîtina hevbeş a Kurd a ku ji konferansê re hate pêşkêş kirin, wekî belgeyeke damezrîner ku îradeyek kolektîf diyar dike û nêzîkatiyek rastîn ji bo çareseriyek dadperwer û berfireh ji bo pirsgirêka Kurd di çarçoveya Sûriyeyeke yekgirtî de, bi nasnameya xwe ya pir-etnîkî, pir-olî û pir-çandî û pir-netewî ku destûra wê mafên neteweyî yên gelê Kurd garantî dike, pabendî peyman û rêkeftinên navneteweyî yên mafên mirovan e, azadî û mafên jinan diparêze û dihêle ku ew bi bandor beşdarî hemû saziyên siyasî, civakî û leşkerî bibin, pejirandin.
Bi pejirandina vê dîtina hevbeş a Kurdan, konferans daxwaza pejirandina wê wekî bingehek ji bo diyaloga neteweyî dike, çi di navbera hêzên siyasî yên Kurd bi xwe de be, çi jî di navbera wan û rêveberiya nû ya li Şamê û hemû hêzên din ên neteweyî yên Sûriyeyê de be. Ew beşdarî avakirina Sûriyeyeke nû dibe ku hemû gelê xwe di nav xwe de bigire, bêyî ku yek ji pêkhateyên wê ji holê rake an jî paşguh bike, dûrî zihniyeta yekalî di raman û pratîkê de, ku rûmet û mafên wan bi destûrî bêyî ti cure cudahîyê biparêze û Sûriye rêzê li têkiliyên xwe yên herêmî û navneteweyî bigire û faktorek aramî û ewlehiyê li herêmê be.
Di encamê de, konferansê biryar da ku di zûtirîn dem de şandeyeke hevbeş a Kurdî ava bibe da ku li ser bingeha pêkanîna vê dîtinê ji bo rastiyeke siyasî bixebite û bi aliyên peywendîdar re danûstandin û diyalogê bike da ku bigihîje naveroka wê û misoger bike.
