Wezîrê Berevaniya Tirkiyeyê Yaşar Guler ragihand, Tirkiye piştî guhertinên li Sûriyeyê, wek yekemîn piştevana rêveberiya nû ya wî welatî derketiye pêş û di warê leşkerî de rahênan û şêwirmendiyê pêşkêşî artêşa Sûriyê dike.
Guler, ku di çarçoveya serdaneke fermî de li Brukselê ye, ji ajansa “Reuters” re axivî û diyar kir, niha zû ye behsa vekişîna leşkerên Tirk ji Sûriyeyê were kirin û ev yek tenê piştî pêkhatina aştî û aramiyeke tam, nemana gefa terorê û ewlehiya sînoran pêkan e.
Guler tekez kir ku karê pêşekî yê Tirkiyeyê li Sûriyeyê parastina yekparçeyî û serweriya axa Sûriyeyê û têkoşîna li dijî terorê ye û Enqere di van mijaran de bi awayekî çalak piştgiriya Şamê dike.
Guler da zanîn, zêdetirî 20 hezar leşkerên Tirkiyeyê li Sûriyeyê ne û got: “Axaftina li ser egera vekişîn yan veguhestina hêzên me ji Sûriyeyê hîn zû ye. Tirkiye rahênan û şêwirmendiya hêzên artêşa Sûriyeyê dike û piştevaniya bihêzkirina bergiriya wan dike. Em gavan davêjin ji bo zêdekirina şiyana berevaniya Sûriyeyê.”
Derbarê plana vekişîna leşkerî de, Guler destnîşan kir ku planeke lezgîn a Artêşa Tirkiyeyê ji bo vekişîna ji Sûriyeyê nîne û mercên vê yekê wiha rêz kir: “Dema Sûriye bi temamî gihişt aştî û aramiyê, dema gefa terorê li navçeyê bi temamî nema, dema sînorên me bi temamî ewle bûn û koçberên Sûriyê vegeriyan welatê xwe, wê demê emê hêzên xwe vekişînin.”
Wezîrê Berevaniyê yê Tirkiyeyê amaje bi êrîşên Îsraîlê yên li ser Sûriyeyê kir û got ku ev êrîş didomin. Lêbelê, wî anî ziman ku “Tirkiye û Îsraîl ji bo kêmkirina aloziyan û rêgirtina li rûdanên leşkerî li Sûriyeyê di danûstandinan de berdewam dibin. Em naxwazin rûdaneke neçaverêkirî rû bide.”
Di dawiyê de, Wezîrê Berevaniya Tirkiyeyê bal kişand ser girîngiya rakirina cezayên Amerîka û Yekîtiya Ewropayê yên li ser Sûriyeyê û got: “Biryara rakirina dorpêçan ji ser Sûriyeyê, ji bo çarenivîsa Sûriyeyê roleke kilîdî dilîze. Em dixwazin cîrana xwe Sûriyeyê ji nû ve ava bikin da ku penaber bi dilê xwe vegerin.”
