PJAK Ji kongreya azadiya Îranê ya li Londonê hat derkirin

Di dema ku amadekariyên “Kongreya Azadiya Îranê” li paytexta Brîtanya Londonê bi dawî dibin de, krîzeke dîplomatîk derket pêş. Partiya Jiyana Azad a Kurdistanê (PJAK) ragihand ku tevî vexwendnameya fermî, di kêliya dawî de navê wan ji lîsteya beşdaran hatiye derxistin.

Kongreya ku biryar e di rojên 28 û 29ê Adarê de li Londonê were lidarxistin, wekî platformek ji bo nîqaşkirina modelên siyasî yên alternatîf ji bo pêşeroja Îranê hatibû plankirin. Zêdetirî 30 aktorên siyasî, saziyên civakî û sendîkayan ji bo vê civînê hatibûn vexwandin. Lê belê, di demjimêrên dawî de guhertineke neçaverêkirî di lîsteya mêvanan de pêk hat.

PJAK: “Ev Kongre Ne Demokratîk e”

Li ser vê biryarê, paş ku navê PJAK ji lîsteya kongreyê hatiye derkirin, Komîteya Pêwendiyên Derve ya PJAKê daxuyaniyeke tund belav kir. PJAKê diyar kir ku ew di destpêkê de bi awayekî fermî hatibûn vexwandin, lê piştre navê wan ji lîsteyê hatiye xirakirin. Di daxuyaniyê de hat destnîşan kirin ku ev helwest nîşan dide ku kongre “ne demokratîk û ne şefaf e.”

Zagros Enderyarî, Berdevkê Dîplomasiya Ewropî yê PJAKê, hûrgiliyên bûyerê wiha parve kirin:

“Komîteya amadekar a kongreyê tenê çend demjimêr beriya destpêkirina civînê gazî me kir. Ji me re gotin, ‘Biborin, lê hûn nikarin beşdarî civîna sibê bibin.’ Ev nêzîkatî li dijî ruhê yekitî û demokrasiyê ye.”

Vetoya Aliyên Din û Bandora “Modela Rojava”

Li gorî agahiyên ku ji pişt perdeya kongreyê derketine, hinek aliyên siyasî yên beşdarî kongreyê dibin, li dijî hebûna PJAKê derketine. Tê gotin ku van aliyan komîteya amadekar neçar kiriye û wekî merc daxuyandine ku “Heke PJAK beşdar bibe, em ê beşdar nebin.”

Çavdêrên siyasî balê dikişînin ser sedemên vê dûrxistinê. Tê diyarkirin ku gelek aliyên opozîsyona Îranê û hinek hêzên Kurdî, ji ezmûna Rojavayê Kurdistanê û rola PYD-PKKê bi fikar in. Tê îdiakirin ku PJAK dixwaze heman modela ku li Rojavayê Kurdistanê hatibû meşandin, li Rojhilatê Kurdistanê jî dubare bike. Ji ber vê yekê, aliyên ku naxwazin daxwazên neteweyî yên Kurdan di bin sîwana vê îdeolojiyê de werin tepisandin, hewl didin PJAKê ji platformên navneteweyî dûr bixin.

Pêşeroja Opozîsyona Îranê

Ev geşedan beriya destpêkirina kongreyê nîqaşên germ li ser yekitiya opozîsyona Îranê derxistine holê. Di demekê de ku zêdetirî 30 aktorên siyasî li Londrayê dicivin, dûrxistina aktorekî wekî PJAKê nîşan dide ku di navbera hêzên opozîsyonê de li ser “paşeroja Kurdistanê” û “modela rêvebirinê” hîn nakokiyên kûr hene.