Danûstandinên li Îslamabadê bêencam bi dawî hatin

Cîgirê Serokê Amerîkayê J.D. Vance, vê sibehê Yekşemê (12ê Nîsana 2026an), bi fermî ragihand ku danûstandinên dîplomatîk ên bi Komara Îslamî ya Îranê re bêyî gihîştina bi tu rêkeftinekê bi dawî bûne. Li pey vê daxuyaniyê, şanda Amerîkayî paytexta Pakistanê, Îslamabad, bi ber bi Waşingtonê ve bi rê ket.

Vance di konferanseke rojnamevanî de ku li paytexta Pakistanê hat lidarxistin, eşkere kir ku tîmên teknîkî û dîplomatîk ên her du welatan nêzîkî 21 saetan bi awayekî rûbirû danûstandin kirine. Lê belê, tevî van hewildanên dirêj, alî negihîştine encameke ku daxwazên her du aliyan dabîn bike û berjewendiyên wan biparêze.

Cîgirê Serokê Amerîkayê destnîşan kir ku Waşingtonê “baştirîn pêşniyarên mimkun” pêşkêşî Tehranê kirine, lê wî amadehiya xwe nîşan neda ku hûrgiliyên van pêşniyaran ji bo raya giştî eşkere bike. Vance bal kişand ser wê yekê ku nakokiya bingehîn li ser bernameya atomî ye û got, “Her çend dezgehên atomî yên Îranê hatine têkdan jî, lê aliyê Îranî ne amade bû soza rawestandina bernameya xwe bide û me tu pabendiyeke piştrast ji bo nehiştina çekên atomî ji wan nebihîst.”

Ji aliyê din ve, medyaya fermî ya Îranê berpirsiyariya têkçûna danûstandinan xist stûyê Amerîkayê. Çavkaniyên nêzîkî tîma danûstandinan a Îranê, Washington bi “çavbirçîtî” û “daxwazên zêde” tawanbar dikin. Wan diyar kir ku Amerîkayê li hincetan geriyaye da ku maseya danûstandinan biterikîne û amade nebûye ku ji daxwazên xwe yên tund vegere.

Di çarçoveya vê aloziyê de, çavkaniyên Pakistanî yên ku çavdêriya van civînan dikirin, ragihandin ku atmosfera navbera her du şandan gelekî “aloziyê” bûye. Hat zanîn ku pêvajoya danûstandinan di navbera “tundbûn û aramiyê” de derbas bûye, heta ku di dawiyê de aliyê Amerîkayî biryar da ku bêyî tu encamekê dawî li hevdîtinan bîne. Heya niha, tu planeke fermî ji bo gera nû ya danûstandinan nehatiye destnîşankirin.