Serokwezîr Mesrûr Barzanî bi serdaneke fermî gihîşt Stenbolê

Serokwezîrê Herêma Kurdistanê Mesrûr Barzanî, îro Şemiyê 9ê Gulana 2026an, bi serdaneke fermî gihîşt bajarê Stenbolê yê Tirkiyeyê. Hat ragihandin ku ev serdan di çarçoveya pêşxistina peywendiyên dîplomatîk û aborî yên herêmî de tê encamdan.

Li gorî daxuyaniya fermî ya ku ji aliyê Hikûmeta Herêma Kurdistanê ve hatî belavkirin, biryar e Serokwezîr Mesrûr Barzanî li Koşka Dolmabahçeyê ligel Serokkomarê Tirkiyeyê Recep Tayyip Erdogan bicive. Her wiha di bernameya serdanê de hevdîtinên ligel Wezîrê Derve yê Tirkiyeyê Hakan Fîdan û hejmarek berpirsên din ên payebilind ên wî welatî jî cih digirin.

Di daxuyaniyê de hat destnîşankirin ku di civînan de, ji bilî gotûbêjkirina li ser pêşxistina peywendiyên dualî yên navbera Hewlêr û Enqereyê, dê guhertin û geşedanên dawî yên rewşa giştî ya Iraqê û herêmê jî bi hûrî werin nirxandin. Tê payîn ku mijarên wekî enerjî, ewlehî û bazirganiya dualî di serê rojeva her du aliyan de bin.

Ev serdan di demekê de pêk tê ku herêm di nav geşedanên siyasî û aborî yên girîng re derbas dibe û peywendiyên di navbera Herêma Kurdistanê û Tirkiyeyê de ji bo aramiya navçeyê xwedî girîngiyeke stratejîk in.