Mezlûm Ebdî: Leyla Qasim sembola rûmet û berxwedana jina Kurd e

Fermandarê Giştî yê Hêzên Sûriyeya Demokratîk (HSD), Mezlûm Ebdî, di 52yemîn salvegera şehîdbûna pêşenga şoreşger Leyla Qasim de peyamek weşand. Ebdî di peyama xwe de bal kişand ser rola dîrokî ya jinên Kurd di parastina rûmeta neteweyî de û soza berdewamiya têkoşînê nû kir.

Fermandarê Giştî yê HSDê, Mezlûm Ebdî, îro (Sêşem, 12ê Gulana 2026an) bi rêya hesabê xwe yê fermî yê medyaya civakî, rêz û hurmeta xwe ji bo “Bûka Kurdistanê” anî ziman. Ebdî destnîşan kir ku Leyla Qasim, wekî keçeke qehreman a Başûrê Kurdistanê, bi îradeyeke polat mînaka serfiraziya jinên Kurd li cîhanê nîşan daye.

Mezlûm Ebdî di peyama xwe de tekez kir ku Leyla Qasim û hevalên wê bi fedakariya xwe rûmeta gelê Kurd parastine. Ebdî got: “Em îro bi rêzdarî Leyla Qasim û hemû jinên pêşeng ên ku di riya azadiyê de canê xwe feda kirine, bi bîr tînin. Têkoşîna me ya ji bo azadiyê, dê her tim li ser şopa van lehengan bi biryardarî berdewam bike.”

Leyla Qasim, ku di 12ê Gulana 1974an de ji aliyê rejîma Beis a Iraqê ve hat sêdaredan, di dîroka Kurdistanê de wekî yekemîn jina Kurd a ku ji bo doza neteweyî hate sêdaredan tê naskirin. Ew bi cesareta xwe ya li ber sêdarê û bi xebatên xwe yên di nava Tevgera Xwendekarên Kurdistanê de, bûye sembola berxwedana jinê û nasnameya azadiyê.