General Mezlûm Kobanî dibêje, Rûsya wisa nîşan dide ku dixwaze wan û Sûriyê li hev bîne lê di rastiyê de tiştekî wisa naxwaze û tekez dike, Rûsya dixwaze bi avakirina bargehan, cihê xwe li Rojavayê Kurdistanê û Sûriyê bi hêz bike
Fermandarê Giştî yê Hêzên Sûriya Demokratîk (HSD) Mezlûm Kobanî derbarê rewşa Rojavayê Kurdistanê, helwesta Rûsyayê û hewldanên lihevanîna wan û rejîmê ji kovara Amerîkî ya Foreign Policy re axivî.
General Mezlûm Kobanî tekez dike, Rûsya wisa nîşan dide ku dixwaze wan û Sûriyê li hev bîne lê di rastiyê de tiştekî wisa naxwaze.
Mezlûm Kobanî got, Rûsya dixwaze bi avakirina bargehan, cihê xwe li Rojavayê Kurdistanê û Sûriyê bi hêz bike lê ew ê nekaribe di vî warî de serkeftî be.
General Mezlûm Kobanî aloziyên li Rojavayê Kurdistanê û bakûrê rojhilatê Sûriyê dixe stûyê Rûsyayê û dibêje, Rûsya li aliyekî nîşan dide ku ew dixwaze wan û hikûmetê li hev bîne, li aliyê din jî li hevkirina wan û Şamê naxwaze.
Fermandarê Giştî yê HSDê di wê hevpeyvîna xwe de dibêje, ew dixwazin bibin beşek ji artêşa Sûriyê ya pêşerojê, ne artêşa Sûriyê ya niha.
