Ev 3 roj in ku hêzeke mezin ji Iraqê li Şingalê bicîh bûye û di rewşa amadehiyê de ye û fermanarekî Pêşmergeyên Şingalê jî dibêje, alozî di navbera PKK û hêzên Iraqê de çêbûye û metirsî li ser Şingalê heye.
Fermandarê Pêşmergeyên Şingalê Qasim Şeşo ji malpera KDP.info re ragihand: “Ev çend roj in ku li sînorê Şingalê alozî derketiye û sebeba wê aloziyê jî ew e ku PKK dixwaze rêveberiya Şingalê bixe destê xwe û hertişt di destê wan de be. Vê yekê jî alozî di navbera wan û Hikûmeta Iraqê de çêkiriye û Hikûmeta Iraqê hêzeke mezin aniye Şingalê.”
Qasim Şeşo wiha got: “Ew hêzên ku li Şingalê bicîh bûne, hêzên nû yên Iraqê ne û jibilî navenda Şingalê li piraniya nahiye û komelgehên Şingalê bicîh bûne û di rewşa amadehiyê de ne.”
Şeşo wiha domand: “Rewşa Şingalê bi xwe aloz e û PKK bi xwe aloztir kiriye, ku dixwazin kêşe û pirsgirêkan bikşînin nava Şingalê. Eger rewş çareser nebe û neyê kontrolkirin, bêguman dê bighê asta pevçûnê di navbera wan hêzên ser bi PKKê û hêzên Iraqê de û ev yek metirsiyê li ser Şingalê çêdike.”
Çavkaniyên pêgeha «Darka Mazî» eşkere kirin ku îro hêzên serbazî yên ser bi Îraqê dukandarên hemû dukanên vekirî li Sinûnê û Xanesorê agahdar kirine ku dergehên dukanên xwe bigrin, ji ber ku metirsiya pevçûnê di navbera wan hêzên ser bi PKK’ê ve heye.
