Encûmena Niştimanî ya Kurdî li Sûriyê (ENKS) daxwazê ji Amerîka dike, sînorekê ji binpêkirinên PYDê li Rojavayê Kurdistanê re deyne.
Di çend rojên borî de 9 ofîsên ENKSê û partiyên di nava wê de hatibûn şewitandin, di wê derbarê de Sekreteriya Giştî ya ENKSê îro di daxuyaniyekê de ragihand, “PYD û dezgehên wê yên ewlekariyê, bi riya êrîşkirina li ser ENKSê û şewitandina ofîsên wê, sivikatîkirina bi al û sembolên Kurdistanê, birêkxistina meşên di bin sembol û diruşmên PKKê de, revandina zarokan û gefxwarina li malbatên Pêşmergeyên Roj, rewşeke girjî û tirsandinê di nava xelkê zêde dike”.
ENKS diyar kir ku armanca PYDê ji van êrîşan ew e “kedên Amerîka yên ji bo amadekirina zemîneke erênî ji bo nehîştina astengiyên li pêş danûstandinên Kurdî dide, têk bide, herwiha ji bo bidawîkirina jiyana siyasî û veşartina têkçûnên wê ye”.
ENKS di vê derbarê de dibêje: “Em bang li Hevpeymaniya Navdewletî û bi taybet Amerîka dikin ji ber li herêmê ye, pêwendiyên wê bi HSDê re hene û serperiştiya danûstandinên Kurdî dike, rêkarên pêwîst bigire û helwesteke cidî li hember kesên li pişt van êrîşan bigire û wan ceza bike”.
