Li navçeya Surê ser bi parêzgeha Amedê ya Bakurê Kurdistanê li taxên Zeynikan, Zozinca Mezin û Yeşilli nêzîka 3 mehan ava vexwarinê nîne û ligel ku nîştecihên taxan serlêdana Rêveberiya Jêrxane û Avê (DISKI) ya girêdayî şaredariya parêzgehê kirine ti encam bi dest nexistine.
Parlamentera HDPê ya Amedê Remziye Tosun li ser hesabê xwe yê Twitterê derbarê mijarê peyamek belav kir û got: “Li Amedê 3 taxên girêdayî navçeya Surê 3 mehên bê av in. Ligel ku nîştecihên taxan di serî de Rêveberiya Jêrxane û Avê ya Amedê (DISKI) û hemû saziyên peywendîdar agahdar kirine lê ev 3 meh in ti çareseriyek nehatiye dîtin. Em şopdarê mijarê ne.”
Tosun ragihand ku derbarê mijarê de pirsyarnameyek bo Wezîrê Navxwe û Wezîrê Çandinî û Daristanê pêşkêş kirine û bo pirsgirêk bê çareserkirin dê proseyê bi şopînin.
Li gor gotina nîştecihên taxan ew bixwe ava vexwarinê peyda dikin û derveyî taxên wan li çend taxên din yên Surê heman pirsgirêk heye û boriyên jêrxaneya bajêr jî li gelek cihan şikestine û zerareke mezin dîtine.
Beriya çend rojan Parlamenterê HDPê Garo Paylan jî derbarê heman pirsgirêkê ya li gundên navçeya Çermûkê ya ser bi parêzgeha Amedê pirsyarnameyek bo parlamentoya Tirkiyê pêşkêş kiribû.
