Rewangeha Sûrî ya Mafên Mirovan ragihand, 2 çekdarên ji komên alîgirên Tehran û Hizbullaha Libnanî di mûşekbarana Îsraîlî li ser li derdora Şamê de hatine kuştin.
Ajansa “SANA” a Sûriyê ji zarê jêderekî leşkerî ragihand, Israîlê bi mûşekan êrîşeke asmanî pêk anî ku di encama êrişan de 2 leşker birîndar bûn û hin ziyanên madî derketine.
Wî jêderî got jî: “Sîstema me ya berevaniya asmanî rûbirûyî mûşekan bû û hejmarek ji wan xistin xwarê.”
Li gorî Rewangeha Sûrî ya Mafên Mirovan, mûşekbaranê depoyeke çekan a Hizbullaha Libnanî, ku di navbera Firokexaneya Navdewletî ya Şamê û devera Seyida Zeyneb li başûrê Şamê de ye,kire armanc.
Rewangehê da zanîn jî, 2 kes di encama mûşekbaranê de hatine kuştin, bêyî ku nasname û regeza kesekî ji wan diyar bike.
Ev bombebaran piştî nêzîkî hefteyekê ji êrîşa Îsraîlê li firokexaneya leşkerî ya Şueyrat li navenda Sûriyê tê ku di encamê de 2 leşker hatin kuştin û 3 leşker jî birîndar bûbûn.
