Rêkeftina Amerîka û Îranê: Mercên Îsraîlê û Danûstandinên Îslamabadê
Piştî ragihandina agirbesta du hefteyan a di navbera Washington û Tehranê de, geşedanên nû di qada dîplomatîk de rû didin. Hat ragihandin ku roja Înê, 10ê Nîsana 2026an, li paytexta Pakîstanê (Îslamabad) danûstandinên fermî di navbera nûnerên her du welatan de dest pê dikin.
Nivîsgeha Serokwezîrê Îsraîlê di daxuyaniyekê de piştgiriya xwe ji bo biryara Serokê Amerîkayê Donald Trump a derbarê sekinandina êrişan de nîşan da. Lê belê, Tel Avîvê berdewamiya vê pêvajoyê bi du mercên sereke ve girêda:
Vekirina Rêyên Deryayî: Divê Îran tavilê tengavên navdewletî û rêyên bazirganiya deryayî veke.
Rawestandina Êrişan: Divê hemû cure êrişên li ser Amerîka, Îsraîl û welatên herêmê bên rawestandin.
Hevneheviya li ser Eniya Libnanê
Li ser mijara Libnanê û Hizbulahê nêrînên cuda hene:
Li gorî Malpera Ynet a Îsraîlî, agirbest şerê navbera Îsraîl û Hizbulahê jî li xwe digire. Di berdêla rawestandina şer li Libnanê de, tê payîn ku Îran Tengava Hurmizê veke.
Lê balê, Berevajî nûçeya malpera Ynet, Nivîsgeha Serokwezîrê Îsraîlê tekez kir ku ev agirbest tenê peywendiya wê bi Îranê re heye û eniya Libnanê li xwe nagire.
Civîna Îslamabadê: Ber bi Rêkeftineke Mayînde ve
Encûmena Bilind a Ewlehiya Neteweyî ya Îranê ragihand ku tîmên wan roja Înê li Îslamabadê bi nûnerên Amerîkayê re dicivin. Armanca Tehranê ew e ku di nav van 14 rojan de bingeha agirbesteke mayînde û rêkeftineke dawî bi Washingtonê re deyne.
Hevahengiya Amerîka û Îsraîlê
Îsraîlê eşkere kir ku ew û Amerîka li ser sê xalên stratejîk hevnêrîn in:
Rêgirtin li ber çekên atomî yên Îranê.
Kontrolkirina bernameya mûşekî.
Birrîna piştgiriya Îranê ya ji bo komên wekî “terorîst” tên pênasekirin.
Amerîkayê soza xwe nû kiriye ku di van danûstandinan de dê berjewendiyên Îsraîlê û hevpeymanên xwe yên Ereb bi temamî biparêze.
