Serok Barzanî pîrozbahî li serokwezîrê raspardî Elî Zeydî kir

Serok Mesûd Barzanî, bi helkefta raspartina wî ji bo posta Serokwezîrtiya Iraqê, pîrozbahî li Elî Zeydî kir. Barzanî di peyama xwe de bal kişand ser giringiya vê gava siyasî û hêvî xwest ku ev guhertin bibe sedema çareserkirina krîzên welat.

Îro, sêşem 28ê Nîsana 2026an, Serok Mesûd Barzanî û Serokwezîrê raspardî yê Iraqê Elî Zeydî bi rêya telefonê axivîn. Li gorî daxuyaniya Baregeha Barzanî, Serok Barzanî di vê peywendiyê de bi germî pîrozbahî li Zeydî kiriye û di erkê wî yê nû û giran de hêviya serkeftinê jê re xwestiye.

Serok Barzanî di dema axaftina xwe de destnîşan kir ku raspartina Elî Zeydî ji bo vê postê, di vê qonaxa hesas de xwedî giringiyeke taybet e. Barzanî diyar kir ku ev yek “derfeteke zêrîn e” daku pêvajoya siyasî ya Iraqê careke din vegere ser rêgeya xwe ya rast û edalet û aramî li welat peyda bibe.

Ev peywendiya telefonî piştî wê yekê hat ku roja duşemê, 27ê Nîsana 2026an, bi rengekî fermî Elî Zeydî wekî berbijarê serkeftî ji bo wergirtina posta Serokwezîrtiya Iraqê hat diyarkirin. Tê payîn ku di rojên pêş de Zeydî dest bi gotûbêjan bike ji bo pêkanîna kabîneya xwe ya nû, ku çavên hemû aliyên navxweyî û navdewletî li ser vê proseyê ne.