Mucteba Xameneyî stratejiya nû ya Îranê eşkere kir: 10 xalên ji bo paşeroja kendavê

Rêberê Bilind ê Komara Îslamî ya Îranê, Mucteba Xameneyî, îro 11ê Gulana 2026an, di daxuyaniyekê de 10 xalên stratejîk derbarê ewlehî û paşeroja Kendav û Tengava Hurmizê de ragihandin. Ev daxuyanî wekî nexşerêyeke nû ya Tehranê ji bo navçeyê û peyameke tund ji bo hêzên biyanî tê nirxandin.

Xameneyî di xalên xwe de tekez kir ku hebûna leşkerî ya Amerîkayê li ser xaka welatên Kendavê, sedema bingehîn a bêaramiyê ye. Wî diyar kir ku baregehên Amerîkayê “bêdesthilat” in û nikarin ewlehiya xwe jî biparêzin. Rêberê Îranê bang kir ku navçe ji bin bandora Amerîkayê derkeve daku ber bi pêşketin û xweşgûzeraniyê ve biçe.

Di xalên din ên stratejiyê de, Xameneyî bal kişand ser çarenivîsa hevbeş a Îranê û cîranên wê yên li Kendav û Deryaya Ummanê. Wî bi tundî ragihand ku ji bo biyaniyan di Kendavê de cih nîne û sîstemeke nû ya birêvebirinê li Tengava Hurmizê dest pê kiriye ku dê bibe sedema destkeftiyên aborî yên mezin ji bo gelê Îranê.

Li gorî daxuyaniyê, Xameneyî serkeftina Îranê di birêvebirina Tengava Hurmizê de wekî bingeha ewlehiya navçeyê pênase kir. Wî daxwaz kir ku hemû derfetên “dijmin” ên ji bo xerabkirina vê tengavê ji holê werin rakirin û şêwazekî nû yê yasayî û îdarî ji bo dabînkirina aramiya gelên navçeyê were cîbicîkirin.

Herwiha hat ragihandin ku Mucteba Xameneyî, piştî wergirtina rapora fermandarê baregeha “Xatemul Enbiya”, ferman daye hemû yekeyên hêzên çekdar ku li ser rûbirûbûna dijminan berdewam bin. Ev fermana Rêberê Îranê nîşana asta herî bilind a amadebaşiya leşkerî ya Tehranê ye di vê qonaxa hesas a navçeyê de.