Numan Kurtulmuş çarçoveya pêvajoya nû diyar kir: “Lêborîna giştî tune ye”

Serokê Parlamentoya Tirkiyeyê Numan Kurtulmuş, derbarê gavên dawî yên pêvajoya “Tirkiyeya bê teror” de daxuyaniyên girîng dan û destnîşan kir ku ev qonax di demeke nêz de dê bigihîje encamê. Kurtulmuş bi eşkereyî ragihand ku di sererastkirina qanûnî ya ji bo vê pêvajoyê de tu babetên wekî “lêborîna giştî” (efû) cih nagerin.

Kurtulmuş ji bo medyaya Tirk nirxandina qonaxa heyî kir û got: “Bi baweriya min, beşeke mezin a pêvajoyê temam bûye. Di demeke nêz de karên mayî jî dê bi encam bibin û pêvajo bi temamî bigihîje armanca xwe.”

Fatûreya Aborî Ya Şer: Zêdetirî 2 Trîlyon Dolar

Serokê Parlamentoyê bal kişand ser bandora neyênî ya şer û pevçûnan a li ser aboriya welat û ziyanên darayî yên heta niha wiha eşkere kir:

“Berê ziyanên aborî yên vî şerî wekî 1.3 trîlyon dolar dihatin texmînkirin. Lê belê bi baweriya min ev jimar niha du qat zêdetir bûye û ji 2 trîlyon dolarî derbas bûye.”

Bangawaziya Ji Bo CHPê: “Bila Piştgirî Berdewam Be”

Numan Kurtulmuş nirxandinek li ser helwesta partiyên opozîsyonê, bi taybetî jî li ser Partiya Gel a Komarî (CHP) kir û got ku amadebûna wan di komîsyonê de pir bi qîmet e. Kurtulmuş xwest ku CHP li ser vê helwesta xwe ya avaker û piştgir a ji bo pêvajoyê berdewam be.

Di dawiya daxuyaniya xwe de, Serokê Parlamentoyê gotegotên li ser bazariyan red kirin û got: “Ji destpêkê ve tu soz nedane PKKê an aliyên din. Qanûna ku amade dibe tenê sererastkirinên teknîkî û hiqûqî dihewîne, efo giştî tê de nîne.”