Malbata Şêx Henan salvegera 14an a karesata Efrînê bi bîr tîne û banga dadweriyê dike

Malbata kesayetê naskirî yê Efrînê, Şêx Henan Şêx Hesen, di salvegera 14an a karesata ku bi serê wan de hatibû, daxuyaniyek belav kir. Malbatê di daxuyaniya xwe de daxwaza dadgehkirin û sizadana berpirsên vê bûyerê kir.

Di daxuyaniyê de hat diyarkirin ku beriya 14 salan, di encama êrîşeke Hêzên Yekîtiya Demokratîk (PYD) de, Şêx Henan Şêx Hesen û du kurên wî yên bi navên Ebdulrehman û Nûredîn jiyana xwe ji dest dane. Hat destnîşankirin ku yek ji kurên wî di bin eşkenceyê de hatiye şehîdkirin.

Li gorî daxuyaniya malbatê, ev rûdan di çarçoveya pêleke “terora siyasî” de pêk hatiye. Di daxuyaniyê de hat gotin ku ev êrîş bi mebesta armancgirtina kesayet û aliyên siyasî yên opozîsyonê, bi taybetî yên ku li ser rêbaza Mistefa Barzanî û ser bi Partiya Demokrata Kurdistan – Sûriya (PDK-S) ne, hatiye encamdan.

Malbatê di berdewamiya daxuyaniya xwe de bal kişand ser rola Serok Mesûd Barzanî û destnîşan kir ku di wê serdemê de ji bo 11 endamên malbatê biryara bidarvekirinê (îdamê) hatibû derxistin. Malbatê da zanîn ku bi destwerdan û hewldanên Serok Barzanî rê li ber karesateke hîn mezintir û berfirehbûna komkujiyê hatibû girtin.

Di dawiya daxuyaniyê de, malbata Şêx Henan bang li hemû aliyên peywendîdar, saziyên hiqûqî û rêxistinên mafên mirovan yên navxweyî û navdewletî kir ku erka xwe ya yasayî bi cih bînin. Malbatê daxwaz kir ku lêkolîneke hûr û dadperwer were kirin da ku tawanbar û berpirsên vê bûyerê li pêşberî dadgehê bên cezakirin.