Hesekê: Koçberên Serê Kaniyê daketin kolanan û daxwaza vegereke ewleh kirin

Koçberên bajarê Serê Kaniyê yên ku ji ber şer û pevçûnan ji cî û warên xwe bûne, xwepêşandaneke berfireh li pêş avahiya parêzgeha Hesekê li dar xistin. Welatiyên derbiderbûyî di vê çalakiyê de daxwaza dabînkirina mafên xwe yên rewa û vegereke ewleh û birûmet bo ser xaka xwe kirin.

Di xwepêşandana ku îro 5ê Tîrmeha 2026an hat birêvebirin de, koçberan bang li civaka navdewletî û aliyên peywendîdar kirin ku keşûhewayekî guncan û rêyeke ewleh ji wan re were peydakirin da ku karibin dawî li jiyana derbideriyê bînin û vegerin ser mal û milkên xwe. Xwepêşanderan bal kişand ser wê yekê ku şert û mercên jiyanê di nav kampên niştecîbûnê de gelekî xerab û dijwar e, û êdî tehamula wan li hemberî vê daxwaza mirovî nemaye.

Di dema xwepêşandanê de, welatiyan çendîn dirûşm û pankartên ku êş û daxwazên wan nîşan didin bilind kirin. Di nav dirûşmên sereke yên koçberan de ev daxwaz derketin pêş:

“Bes e koçberî.”

“Heta kengî veger dê were paşxistin?”

“Ji mafê me ye em li malên xwe bijîn, ne li kampan.”

“Salên derbideriyê temenê me dizî, hûn jî mafên me yên vegerê nedizin.”

Çalakvanên mafên mirovan li herêmê tekez dikin ku doza koçberên Serê Kaniyê pêwîstî bi çareseriyeke ramyarî û ewlehî ya bilez heye, da ku ev malbatên ku bi salan e di bin konên kampan de rûberûyî serma û germê dibin, bigihîjin mafê xwe yê herî xwezayî ku ew jî jiyana li ser xaka bav û kalên wan e.