Numan Kurtulmuş ji bo qanûna pêvajoya aştiyê serdana firaksiyonên parlamentoyê dike

Serokê Parlamentoya Tirkiyeyê Numan Kurtulmuş, di çarçoveya danûstandinên girêdayî amadekirina projeyasaya çarçoveya “Pêvajoya Aştiyê” de, sibe Sêşemê (21ê Tîrmeha 2026an) dest bi serdana firaksiyonên partiyên siyasî yên di parlamentoyê de dike. Li gorî agahiyên ji aliyê medyaya nêzîkî Partiya Demokrasî û Wekheviya Gelan (DEM Partî) ve hatine ragihandin, armanca sereke ya van serdanan avakirina lihevhatin û yekdengiyeke giştî ye li ser vê projeyasayê.

Li gorî bernameya fermî ya serdanan, Numan Kurtulmuş dê sibe saet 12:30an de destpêkê ligel Serokê Partiya Tevgera Neteweyî (MHP) Devlet Bahçeli bicive. Paşê saet 14:00an de, Serokê Parlamentoyê dê biçe serdana firaksiyona DEM Partiyê û dê ligel Hevserokên Giştî Tülay Hatimoğulları û Tuncer Bakırhan û cîgirên serokên vê firaksiyonê hevdîtinekê encam bide. Tê çaverêkirin ku Kurtulmuş di roja Çarşemê (22ê Tîrmeha 2026an) de jî serdana firaksiyona Partiya Dad û Geşepêdanê (AK Partî) bike.

Di van civînan de, Serokê Parlamentoyê dê aliyên siyasî di barê naveroka projeyasaya çarçoveyê de agahdar bike û ji bo derbasbûna wê ya bi lihevhatinî daxwaza piştgiriya wan bike. Di pişta van tevger û hevdîtinan de, amadekariyên lezgîn ên Enqereyê hene ji bo şandina projeyasayê bo meclisê. Li gorî zanyariyên hatine eşkerekirin, ev projeyasa dê bi taybetî çarenûs û pênaseya qanûnî ya wan çekdarên PKKê çarçove bike ku çekên xwe dadinin.