Piştî pesendkirina yasayê, çarenivîsa Ocalan û serkirdeyên PKKê dê çi be?
Parlamentoya Tirkiyeyê projeyasaya “Bihêzkirina Piştevaniya Nîştimanî û Yekrêziya Civakî” pejirand, ku armanc jê danîna çekan a PKKê û vegera endamên wê ye. Lê belê zêdetirî 800 kadroyên dêrîn ên wê partiyê ji vê yasayê bêpar dimînin.
Parlamentoya Tirkiyeyê bi piraniya dengên parlamenteran, projeyasaya taybet bi “Proseya Aştiyê” û bêçekkirina Partiya Karkerên Kurdistanê (PKK) pejirand. Li gorî zanyariyên ku ajansa “T24” belav kirine, niha hemû çav li ser Encûmena Ewlehiya Neteweyî ya Tirkiyeyê ne daku dema dawî ya bidawîhatina vê proseyê diyar bikin.
Tê pêşbînîkirin ku di nav du-sê mehên bê de, proseya danîna çekan a PKKê bi rêjeya %80 were cîbicîkirin. Ev yek dê bibe sedem ku Encûmena Ewlehiyê biryara dawî li ser destpêkirina vegera çekdaran bide.
Ji bo şopandina vê rewşê, komîteyeke taybet bi serokatiya Cîgirê Serokkomar tê avakirin. Di vê komîteyê de wezîrên Dad, Navxwe, Derve, Berevanî û Serokê MÎTê cih digirin. Erkê vê desteyê şopandina rewşa ser erdê li herêmên Iraq, Îran û Sûriyeyê ye.
Di navaroka yasayê de hatiye diyarkirin ku zêdetirî 800 kes ku di nav wan de damezrêner û kadroyên dêrîn ên PKKê hene, ji vê efûyê sûd wernagirin. Ev kes bi taybetî ew in ku berî sala 2005an cezayê zîndana hetahetayê wergirtine yan jî bi “kuştina bi qestî” hatine tawanbarkirin.
Herwiha nêzîkî 300 serkirdeyên payebilind ên PKKê jî nikarin vegerin Tirkiyeyê. Li gorî planê, ev serkirde dê li herêmeke Iraqê bêyî ku çalakiyên rêxistinî bikin, werin niştecîkirin.
Di çarçoveya vê proseyê de, tê payîn ku Rêberê PKKê Abdullah Ocalan ji bo şûneke nû li hundirê girtîgeha Îmraliyê were veguhestin. Di qonaxên bê de, dê rê were dayîn ku rojnamevan û nûnerên rêxistinên civakî serdana wî bikin.
Roja Duşemê (10ê Tebaxa 2026an), Parlamentoya Tirkiyeyê piştî nîqaşên dijwar projeyasa xist dengdanê û ji koma 562 parlamenteran, 468 parlamenteran dengê “Erê”, 88 parlamenteran dengê “Nan” û parlamenteran jî dengê “Bêalî” dabû.
Ev yasaya ku ji 12 madeyan pêk tê, piştî xebata salekê ya Komîsyona Çareseriyê hatibû amadekirin, ku di wê heyamê de guhdariya 140 kesayetên cuda hatibû kirin.
