Desteya Mafên Mirovan êrîşa dronî ya li ser Pîrmamê şermezar kir: “Binpêkirina eşkere ya serweriya axê ye”

Desteya Serbixwe ya Mafên Mirovan li Herêma Kurdistanê derbarê êrîşa dronî ya serê sibeha îro de daxuyaniyek belav kir û bi tundî armancgirtina deverên Herêma Kurdistanê şermezar kir. Êrîşa ku ji sînorên Komara Îslamî ya Îranê ve li ser qezaya Pîrmamê hate kirin, rasterast nivîsgeha taybet a Serokwezîrê Herêma Kurdistanê û cihê manê yê Rêveberê Ajansa Parastinê kiribû armanc.

Di daxuyaniyê de hate diyarkirin ku saet 12:28 ê serê sibehê ya îro Duşemê (17ê Tebaxa 2026an), du dronên bombekirî yên ji cûreyê “Hedîd-110” ji aliyê sînorê Îranê ve hatine arastekirin. Desteyê tekez kir ku ev êrîş binpêkirineke xeternak û eşkere ye li dijî serweriya axa Iraq û Herêma Kurdistanê, û li dijî hemû pîvok û peymannameyên navdewletî yên mafên mirovan e.

Tevî ku di encama vê êrîşê de ti zirarên canî neketine holê, Desteyê destnîşan kir ku parastina ewlehî û jiyana welatiyan mafekî bingehîn e. Di daxuyaniyê de hate destnîşankirin ku bi ti hincetan nabe axa Herêma Kurdistanê bibe meydana êrîş, hevrikî û peyamên leşkerî yên aliyên derve.

Di dawiya daxuyaniya xwe de, Desteya Serbixwe ya Mafên Mirovan bang li Hikûmeta Federalî ya Iraqê û civaka navdewletî kir ku helwesteke zelal û cidî nîşan bidin, ji bo rawestandina van binpêkirinên berdewam gavên lezgîn bavêjin û ewlehî û serweriya herêmê biparêzin. Her wiha Dijetîrora Kurdistanê jî daxuyand ku ev destdirêjî bi ti awayî nayên qebûlkirin û encamên wê dikevin ser milê encamderan.