Li paytexta Tirkiyeyê Enqereyê, polîsekî xanenişîn di dema çalakiya daxwazkirina mafên aborî de li ber avahiya Dadgeha Destûra Bingehîn dawî li jiyana xwe anî. Bûyerê di qada siyasî û raya giştî de karvedan û bertekên tund li pey xwe anîn.
Li Enqereyê, koma karmend û polîsên xanenişîn ji bo daxwazkirina mafên xwe yên aborî û zêdekirina mûçeyan li ber avahiya Dadgeha Destûra Bingehîn di çalakiyê de bûn. Çalakvanan daxwaz dikir ku rêjeya zêdekirina mûçeyan a ku ji bo karmendên serkar hatî pejirandin, ji bo wan jî bête bicihanîn. Di nav çalakiyê de, polîsekî xanenişîn ê 60 salî ji ber şert û mercên giran ên jiyanê û krîza aborî bi çekê xwekuştin pêk anî.
Ozgur Ozel: Em li ber teqîneke civakî ne
Peywendîdarî bûyerê, Serokê Giştî yê Partiya Gel a Komarî (CHP) Ozgur Ozel bertekeke tund nîşan da û diyar kir ku ev bûyer rewşa giran a xanenişînan nîşan dide.
Ozel di daxuyaniya xwe de tekez kir ku krîza aborî xanenişîn gihandine asteke krîtîk û got:
“Hêrseke mezin di nava xanenişînan de kom dibe. Em li ber teqîneke civakî ne; mijar êdî gihîştiye asta serhildanê. Mixabin karesatek ku nedihat xeyala kesî rû da. Divê rêvebirên dewletê demildest berê xwe bidin evî alî û pirsgirêkê bibînin. Êdî bes e! Xanenişînek dawî li jiyana xwe tîne, lê belê medyaya desthilatê van êşan paşguh dike.”
Serokê CHPê her wiha banga çareseriya bilez an jî hilbijartinê kir û got: “Beriya ku êşên girantir û xirabtir rû bidin, divê yan sindoqa hilbijartinê were pêşberî welatiyan yan jî rasterast û bêyî derengketin rewşa aborî ya xanenişînan bête başkirin.”
