Hevseroka Partiya Wekhevî û Demokrasiya Gelan (DEM Partî) Tûlay Hatîmogûllari, di civîna koma partiya xwe ya li Parlamentoya Tirkiyeyê de daxuyaniyên girîng dan. Hatîmogûllari destnîşan kir ku pirsa Kurd li Tirkiyeyê rasteqîniyek e û ji bo çareseriyeke demokratîk banga azadiya Abdullah Ocalan û pêkanîna yasaya çarçoveyê kir.
“Pêwîstî bi aştiyeke rûmetdar heye”
Hatîmogûllari bersiv da daxuyaniyên derbarê nebûna pirsa Kurd de û anî ziman ku ev pirsgirêk rasterast bi aramiya herêmê ve girêdayî ye. Wê got: “Ez ji wan re dibêjim ên ku dibêjin pirsa Kurdan nîne, em bi cidî tekez dikin ku li vî welatî û deverê pirsa Kurdan heye. Em wekî DEM Partî alîgirên aştiyeka rûmetdar in li ser bingeheka demokratîk. Ji bo vê yekê jî, divê tavilê tecrîda li ser Îmraliyê bê rakirin û Ocalan bê azadkirin.”
“Girtiyên siyasî tên hiştin”
Di berdewamiya axaftina xwe de, Hatîmogûllari bal kişand ser salvegera operasyonên siyasî yên 4ê Mijdara 2016an û bal kişand ser dosyaya doza Kobaniyê. Hevseroka DEM Partiyê rexne li neavêtina gavên li gorî biryarên Dadgeha Mafên Mirovan a Ewropayê (DMME) girt û anî ziman ku nûnerên siyasetê yên wekî Selahattin Demirtaş û Figen Yuksekdag hîn jî di girtîgehê de wekî “rehîneyên siyasî” têne girtin. Wê her wiha nerazîbûna xwe li dijî polîtîkayên tayînkirina qeyûman anî ziman.
Banga lezgîn ji bo qanûna çarçoveyê
Tûlay Hatîmogûllari da zanîn ku derheqê pêvajoyê de pirsên zelal di civakê de hene û berpirsiyariya van pirsan spart desthilatê: “Bi milyonan welatî dipirsin ka wê qanûn kengî bikeve dewrê, veger û garantî wê çawa bin. Ev pirs erk û berpirsiyariya desthilatê ne. Divê bê derengxistin dest bi yasaya çarçoveyê bê kirin. Ti hêz nikare pêşiya hatina aştiyê li ser vê axê bigire.”
Di civînê de Dayikên Aştiyê ku ji 24 bajaran hatibûn Enqereyê jî amade bûn. Hatîmogûllari diyar kir ku ew ê serdana girtîgehên Edîrne û Kandirayê bikin û têkoşîna wan heta azadiya hemû girtiyên siyasî dê berdewam bike.
