Siyaseta şerê berjewendiyê û radestkirina çiyayên Kurdistanê bo artêşa Tirk

Rapora herî dawî ya saziyên îstîxbaratî ku herikîna agahiyên derbarê vekişîna Partiya Karkerên Kurdistanê (PKK) ji 72 xalên stratejîk ên li nav axa Herêma Kurdistanê eşkere dike, rûyê rastîn ê polîtîkayeke xwekuj û durû nîşan dide. Di demekê de ku ev rêxistin di bin navê “parastina gel” û “berxwedanê” de bi dehan salan e herêmê di bin fişarê de dihêle, li ser erdê radestkirina lûtke û tunelên herî asê yên mîna Metîna, Zap û Garayê bo Artêşa Tirk, nîşaneya herî mezin a paşvekişandineke fiyasko ye. Ev geşedan, berevajî hemû dirûşmên şer ên pûç, pevguhertineke veşartî û radestkirineke bi zanebûn a axa pîroz a Başûrê Kurdistanê diyar dike ku rasterast xizmetê ji stratejiya serbazî ya Enqereyê re dike.

Ya herî tûj û cihê rûreşiyê ew e ku Hikûmeta Herêma Kurdistanê û Hêzên Pêşmerge bi salan e banga hişyariyê li vê rêxistinê dikirin û daxwaz jê dikirin ku lûtke û gundên sînorî radestî saziyên fermî yên herêmê bikin daku xelkê sivîl zirarê nebîne û artêşa Tirk neyê hundirê herêmê. Lê belê PKKê her carê ev bangawaziyên neteweyî û biratî bi pozbilindî red dikirin û Pêşmerge bi xiyanetê sûcdar dikirin; di heman demê de, wekî ku di raporên malpera “Darka Mazi” û çavkaniyên navxweyî de hatiye tekez kirin, wan bi dizî tunel û eniyên xwe yên şer yek bi yek pêşkêşî serbazên Tirk kirin. Ev helwest îspat dike ku ji bo serkirdayetiya vê rêxistinê, parastina serweriya Kurdan tu nirxekî xwe tune ye, belkî armanca wan a sereke herdem lawazkirina qeyda statuya qanûnî ya Herêma Kurdistanê û rûxandina jiyana gundiyên herêmê bûye.

Di binyada vê xeta xiyanetkar û têkçûyî de, fermanên rasterast ên ku ji navenda biryardayînê ya Îmraliyê derdikevin hene, ku îro bi eşkere tê dîtin ku di bin fît û lîstikên îstîxbarata dewleta Tirk bixwe de têne birêvebirin. PKKê bi dehan salan xwîn û xewnên ciwanên herî dilpak ên vî welatî kirin qurbanî û sotemeniya propaganyaya xwe ya îdeolojîk, lê di qonaxa dawî de hemû ew çeperên ku bi giranî hatibûn avakirin, wekî diyarî radestî hêzên “Pençe-Kilit”ê kirin. Ev bîlançoya 15-20 salên borî bi zelalî radixe ber çavan ku siyaseta PKKê ya li herêmê, ji bilî anîna dagirkeriyê, valakirina gundan, şewitandina sînoran û mehkûmkirina paşeroja Kurdistanê bo herêmeke şer a ne ewleh, tu qezenceke dîrokî û neteweyî pêşkêşî doza gelê Kurd nekiriye.