Serokê Daîreya Ewlekariyê ya Ser erkaniya Îranê Ebdulla Iraqî, êrîşa moşekiya ku wan duh li dijî baregehên Emerîkayê yên li Iraqê kir, bi bîr xist û wiha got, “Emê di sibe rojeke nêzîk da toleke tundtir (ji Emerîkayê) bistînin”.
Li gorî Ajansa Nûçeyan Tesnîmê, Iraqî li navçeya Îsfehanê axivî û wiha got, “Arteşa Pasdarên Şoreşê, yek ji bazûyên rêber Ayetullah Elî Xameneyî ye û dê di sibe rojeke nêzîk da ji dijmin (Emerîka) toleke tundtir bistîne”.
CIA û Mossad alîkarî bo kuştina Suleymanî kirin
Şêwirmendê Bilind ê Eskerî yê Xameneyî, Yehya Rehîm Sefewî jî diyar kir ku êrîşa dijî Qasim Suleymanî “bi hevkariya CIA û Mossadê” hat kirin.
Sefewî di axaftina xwe ya li Binkeya Pasdarên Şoreşê li Tebrîzê da wiha got, “Şebekeyên îstixbaratê yên terora navneteweyî CIA û Mossad hesabekî xelet kirin û ev cinayet kirin”.
ÊRÎŞA DIJÎ BAREGEHA EYN EL-ESED
Wezareta Parastinê ya Emerîkayê (Pentagon) li 3/1/2020an ragihandibû ku Qasim Suleymanî Fermandarê Hêza Qudsê ya Mihafizên Şoreşa Îranê û Alîkarê Serokê Heşda Şeibî Ebo Mehdî el-Muhendis di êrîşa ku nêzî Balafirgeha Bexdayê hat kirin da hatin kuştin.
Di êrîşê da ligel Suleymanî û serbazên Îranî, 10 kesên ku di navê da Muhendis jî heye, hatibûn kuştin.
Rêberê dînî yê Îranê Ayetullah Elî Xameneyî di daxuyaniya xwe ya ewil a piştî êrîşê da gotibû ku ew ê ji Emerîkayê tolê bistînin.
Pasdarên Şoreşê, 5 roj piştî kuştina Suleymanî duh êrîşî baregeha Eyn el-Esed a Emerîkayê kiribûn û îdia kiribûn ku di êrîşê da 80 eskerên Emerîkayê hatin kuştin. Lê belê Serokê Emerîkayê Donald Trump jî eşkere kiribû ku di êrîşê da tu tişt bi kesî nehat û kuştî û birîndar tunene.
