Wezîrê Perwerdeyê yê Sûriyê Darim Teba li Parlamena Sûriyê gotarek pêşkeş kir û tê de got, ewê tevahiya dibistanan ji destê Rêveberiya Xweser derxin û zimanê kurdî lê bidin xwendin.
Wezîrê Perwerdeyê yê Sûriyê Darim Teba ragihand, xwendin û perwerdehiya li dibistanên ku di destê Rêveberiya Xweser de ne tê kirin, ne perwerdehiyeke niştimanî ye û got, hikûmeta Sûriyê kar ligel rêxistinên navdewletî dike, ji bo dibistanên di destê Rêveberiya Xweser de ne, vegerînin bin kontrola hikûmeta Sûriyê.
Wezîrê Perwerdehiyê da zanîn: “Dê li wan dibistanan du demjimêran zimanên kurdî, suryanî û aşûrî bên hînkirin, eger dê û bavê xwendekaran vê yekê daxwaz bikin.”
Teba diyar kir, “Em li gel hînkirina bi zimanên herêmî ne. Ev yek normal e û dibistanên me yên Ermenî yên bi zimanê Ermenî hîn dikin hene.”
Hêjayî bibîrxistinê ye, ji sala 2015an ve Desteya Perwerde û Fêrkirinê ya Rêveberiya Xweser perwerdehiya bi zimanê kurdî û rêbaza xwe derbasî dibistanên perwerdeyê dide û tenê perwerdehiya di bin banê hikûmeta Sûrî de li çargoşeya ewlehiyê ya bajarê Qamislo û Hesekê tê dayîn.
Mijara perwerdehiyê di danûstandinên Encûmena Niştîmanî ya Kurd li Sûriyê (ENKS) û Partîyên Yekîtiya Niştimanî ya Kurdî (PYNK) de jî tê gotûbêjkirin ku ENKS tekez dike ku ew ne li dijî perwerdehiya bi zimanê kurdî ne, le divê guhertin di sîstema perwerdehiyê û rêbaza xwendinê ya Rêveberiya Xweser de çêbibe.
