Cîgirê Alîkarê Wezîrê Derve yê Amerîkayê bo Karûbarên Rojhilata Navîn Ethan Goldrich bi berpirsên ENKSê re hevdîtinek pêk anî. Ji ENKSê Îbrahîm Biro û Ebdulhekîm Beşar di civînê de beşdarbûn.
Balyozxaneya Amerîkayê li Şamê li ser hesabê xwe yê Facebookê behsa vê civînê dike. Balyozê DYA li Şamê dibêje; “Goldrich bi nûnerên Encumena Niştîmanî ya Kurdî re civiya û li ser geşedanên li Bakurê Sûriyê, lihevkirina nav Kurdan, rewşa penaber û awareyan û metirsiya DAIŞê ya berdewam gotûbêj kirin.”
Wê şanda wezareta derve ya Amerîkayê herwiha serdana Rojavayê Kurdistanê jî kir û li Qamişlo bi Fermandarê Giştî yê HSDê Mezlûm Kobanî û Fermandara Giştî ya Yekîneyên Parastina Jinê (YPJ) Newroz Ehmed re hevdîtin pêk anî.
Di civînê de rewşa siyasî, ewlehî û aborî ya navçeyên Rojavayê Kurdistanê û Bakur û Rojhilatê Sûriyê hat gotûbêjkirin. Li gorî zanyariyan her du aliyan di civînê de tekezî li ser girîngiya ewlehî, aramî û rêkeftina agirbestê li Bakur û Rojhilatê Sûriyê kirine.
Serokê şandê Ethan Goldrich ji Fermandarê HSDê re got ku, ew bi dewletên pêwendîdar re di têkiliyê de ne, ji bo welatiyên xwe ji herdu kampên Hol û Roj vegerînin, ku bi hezaran girtî ji çekdarên DAIŞê li wan deran hene.
