HSDê diyar kir ku li bajarokê El Şihêlê yê Dêrezorê di 2 êrişên cuda de 4 şervanên wan canê xwe ji dest daye û 7 şervanên wan jî birîndar bûne.
Hêzên Sûriyeya Demokratîk (HSD) ragihand ku DAIŞê li bajarokê El Şihêlê yê Dêrezorê bi otomobîleke bombebarkirî êrişî xaleka wan a leşkerî kiriye.
Her wiha got: Xwekujê ku otomobîl diajot, nêzîkî deriyê sereke yê xala me ya leşkerî bû û xwest derbasî hundirê xala serbazî bibe. Lê şervanên me rûbirûyê wî bûn û wan nehişt ku derbasî hundir bibe. Ji ber wê jî terorîst neçar ma ku otomobîla xwe li ber derî biteqîne.
Li gorî daxuyanya hesedê 3 şervanên wan şehîd bûn û 7 şervan jî birîndar bûn.
Di berdewamiya daxuyaniyê de jî HSDê eşkere kir ku di dema ku şervanên wan birîndarên xala leşkerî derman dikirin û cenazeyên şervanan radikirin de milîsên nêzîkî Hikûmeta Sûriyeyê êrişî wan kirine.
Li gorî daxuyaniya HSDê şervanekî wan jî ji ber êrişa milîsên Hikûmeta Sûriyeyê canê xwe ji dest daye.
