Desthilatên Tirkiyeyê zêdetir ji 16 hezar penaberên Sûrî di meha Hezîranê de ji nava xaka xwe derkirin û şandin navçeyên cuda yên bakurê Sûriyeyê.
Li gorî raporên medyayî, desthilatên Tirkiyeyê di meha Hezîranê de 16 hezar û 500 penaberên Sûrî di 4 deriyên sînorî re derkirin û şandin navçeyên cuda yên bakurê Sûriyeyê yên di destê çekdarên opozîsyonê de.
Li gorî zanyariyan, proseya dersînorkirinê piştî wergirtina hemû belge û pencemorên tiliyên penaberên hat kirin, ji bo nikaribin careke din vegerin.
Hikûmeta Tirkiyê rojane hejmarek penaberên Sûrî vedigerîne herêmên Idlib, Ezaz, Serê Kaniyê û Girê Sipî.
Çalakvanên Sûrî jî dibêjin, proseya vegerandina penaberan bi darê zorê tê kirin û bang li civaka navdewletî dikin ku bi erkê xwe li hember vê rewşê rabin.
