Rêveberiya Xweser a Rojavayê Kurdistanê derbarê êrişên dawî yên li dijî Elewiyên li Sûriyeyê tên kirin daxuyaniyek da û got, “Divê pirrengiya li Sûriyeyê bê parastin.”
Rêveberiya Xweser a Rojavayê Kurdistanê têkildarî êriş û rûdanên dawî yên li Sûriyeyê de daxuyaniyeke nivîskî weşand.
Rêveberiya Xweser diyar kir ku bûyerên dawî yên li herêmên peravên Sûriyeyê yên li dijî Elewiyan û şewitandina darên sersalê ya li Hema û Humisê xizmeta berjewendî û paşeroja Sûriyeyê nakin.
Di daxuyaniyê de hat gotin ku ji ber geşedanên bilez ên li Sûriyeyê rû didin, bi taybetî piştî rûxandina desthilata Esed, ya baştir ew e ku ber bi zîhniyeta avakirina Sûriyeyeke nûjen ve bimeşin.
Di daxuyaniyê de wiha hat gotin: “Hevgirtin û yekitiya gelê Sûriyeyê di bipêşxistina modela rêveberiyeke nîştimanî ya li ser esasê edalet û wekheviyê de lazimiyeke dîrokî ye.
Pirrengiya li welatê me Sûriyeyê dewlemendiyeke dîrokî ye û xwedî nirxekî nîştimanî civakî ye.
Ev dewlemendiya ku Partiya Baasê ji holê rakiribû dê rastiya Sûriyeyê û nasnameya wê ya resen nîşan bide.
Pêkanînên li peravên Sûriyeyê yên li dijî Elewiyan diqewimin û şewitandina darên sersalê li Hema û Humsê nakevin xizmeta berjewendiyên Sûriyeyê û paşeroka wê.
Parastina pirrengî û dewlemendiya nîştimanî ya Sûriyeyê bingeheke girîng e yê avakirina Sûriyeyeke bihêz.
Em wekî Rêveberiya Xweseriya Demokratîk a Bakur û Rojhilatê Sûriyeyê teqez dikin ku parastina pirrengiya li Sûriyeyê û nebinpêkirina sembol, urf û kevneşopiyan pêwîstiyeke lezgîn e.
Parastina maf û erkên pêkhateyan erkekî nîştimanî ye.
Nêzîkatiyên şaş ên li hemberî çi pêkhateyeke Sûriyeyê dê bandorên wê yên neyinî hebin û dê xizmeta armaniya nakin.
Ji vê zêdetir dê bibin sedema rûdana şer û nakokiyan û dê yekitiya Sûriyeyê bixe metisiyê.
Di salên dirêj de men bi rêya xeta xwe ya projeya neteweya demokratîk yekitî, hevgirtina pêkhateyan a li ser bingehê tevkariyê, têkoşîna hevbeş a li dijî tevahî projeyên ku şer û nakokiyan gûr dikin parast.”
