Piştî ahenga Newrozê ya bajarê Kolnê yê Almanyayê ku hejmareke zêde ya Kurdistaniyên her çar parçeyên Kurdistanê tevlî wê bûn, Serok Barzanî di peyamekê de dilxweşiya xwe ji bo tevlîbûna hejmareke zêde ya welatiyên Kurd di wê ahengê de diyar kir û got, “Di ahenga Kolnê de rêbaza dilsoziyê bo welat û Kurdistanîbûnê bi ser keft.” Konfederasyona Revenda Kurdistanî jî bersiva peyama Serok Barzanî dide û amajeyê dide, “Em peyama we wekî piştgiriyeke bihêz ji bo Kurdistaniyan dibînin.”
Konfederasyona Revenda Kurdistanî îro ( Sêşem, 25.03.2025) bersiva peyameke Serok Barzanî ji bo ahenga Newrozê ya Kolnê da û got, “Em peyama Serok Barzanî wekî piştgiriyeke bihêz ji bo gelê Kurd û Kurdistaniyan li diyasporayê û parçeyên axa Kurdistanê dibînin.” Herwesa got, “Me spasiyên bêdawî ji bo Serok Barzanî hene, ku herdem piştevanê Konfederasyona Revenda Kurdistanî ye.”
Konfederasyona Revenda Kurdistanî di peyama xwe de amaje da Serperiştê Giştî yê Revenda Kurdistanî Şîfa Barzanî û Baregayê Barzanî, ku bi bizavên wan ên diplomasî karî serkeftineke mezin di ahenga Newrozê ya Kolnê de bi dest bixin.
Konfederasyona Revenda Kurdistanî di wê peyamê de pesna partî û aliyên siyasî yên Kurdistanî kir, ku bi coşeke zêde piştevaniya biserxistina ahenga Kolnê kir, zêdebarî Serokê Şaredariya Kolnê ku bi peyameke fermî pişkdarî cejna wan bû, tevî polîsên wî bajarî ku ewlehiya ahenga wan parast, û tevlîbûna bi sedan hezar Kurdistaniyên her çar parçeyên Kurdistanê bi kincên Kurdî û alaya pîroz a Kurdistanê. Konfederasyonê ew aheng wekî serkeftineke mezin ji bo Kurdistanê wesif kir.
Piştî birêveçûna ahenga berfireh a Newroza Kolnê li roja 23.03.2025ê, Serok Barzanî di peyamekê de dilxweşiya xwe ji bo tevlîbûna hejmareke zêde ya welatiyên Kurd di wê ahengê de diyar kir û got, “Di ahenga Kolnê de rêbaza dilsoziyê bo welat û Kurdistanîbûnê bi ser keft.” Herwesa got, “Destekê neemîn bizava têkdan û anîna gêleşokê kir û di romalkirinê de xwest peyama kombûna cemawerî ya Newroza Kolnê bi aqarekî din de bibe, lê deng û rengên rastîn ên tevlîbûyîyan rê neda ku ew bizav bi ser bikevin.”
