Hevseroka DEM Partiyê Hatîmogûllari Vê Carê Ji Bo Îranê Bû Mertal: Divê DYAyê Êrîşên li ser Îranê Rawestîne

Hevseroka Giştî ya DEM Partiyê Hatîmogûllari, ku berê rejîma Esad parastibû, vê carê xwe kire mertal ji bo rejîma Îranê û li dijî operasyonên Îsraîlê derket.

Tulay Hatîmogûllari di civîna koma jinan a partiya xwe de axivî û got: “Qedera Îranê gelên Îranê diyar dikin. Kurd, Azerî, Belûc û Fars diyar dikin. Divê DYA û Îsraîl demildest dawî li êrîşên xwe bînin. Çareserî di Komara Îranê ya Demokratîk de ye.”

Hatîmogûllari bal kişand ser êrîşên DYA û Îsraîlê yên li ser Îranê û ew êrîş şermezar kirin. Hatîmogûllari got: “Em wek jin vê êrîşê bi tundî şermezar dikin.”

Hatîmogûllari di axaftina xwe de derbarê operasyonan de ev tişt anîn ziman:

“Dema ku DYA û Îsraîl li ser masê danûstandinên xwe ligel Îranê didomandin, êrîş birin ser Îranê. Îhtimaleke mezin heye ku ev şer tevahiya herêmê vegire; jixwe niha bandor li Iraq, Libnan û welatên Kendavê kiriye û herêm ber bi kaoseke bixwîn ve diçe. Di van êrîşan de li Îranê dibistaneke keçan hat bombekirin. We hemûyan dît, di wê dibistanê de nêzî 170 keçan, belkî bêtir, hatin qetilkirin. Bi sedan birîndar hene. Dîsa mirina jinan, dîsa mirina zarokan û dîsa encamên şerên ku mêran dane destpêkirin. Em wek jin vê êrîşê bi tundî şermezar dikin. Li van axan gelek xwîn herîkî, êdî bes e.”

Hatîmogûllari: “Çareserî ne di şer de, di Îrana Demokratîk de ye”

Hatîmogûllari destnîşan kir ku operasyona li ser Îranê nayê rewakirin û got: “Çareserî ne di şer de ye, ne di rejîma otorîter de ye; çareserî di avakirina Komara Îranê ya Demokratîk de ye.”

Hatîmogûllari di axaftina xwe de bal kişand ser rewşa Ocalan û daxuyaniya wî ya 27ê Sibatê û got: “Entegrasyona demokratîk herî kêm bi qasî avakirina Komarê giring e.”

Hatîmogûllari behsa daxwazên gelê Kurd kir û îdia kir ku ev daxwaz ne tenê ji bo Kurdan, ji bo tevahiya Tirkiyeyê tê wateya demokratîkbûnê. Lê belê, derbarê daxwaza nasnameyê ya Kurdan de tiştek negot; tenê xwest ku statuyek ji bo Ocalan bê diyarkirin.

Ev bangawaziya “demokratîkkirina Îranê” û rewanedîtina êrîşên li ser Îranê (rejîma ku zilmê li gelê Kurd dike û rêberên wan li ser masê qetil kirine), bû sedema bertekên mezin. Kurdên Rojhilatê Kurdistanê yên ku medyaya Tirkî dişopînin, piştî banga DEM Partiyê û Hatîmogûllari, hashtaga “STOP DEM Parti” parvekirin kirin.