Nêçîrvan Barzanî pêşwazî li agirbesta navbera Amerîka û Îranê kir

Serokê Herêma Kurdistanê Nêçîrvan Barzanî, bi fermî piştgiriya xwe bo agirbesta 14 rojî ya di navbera Dewletên Yekbûyî yên Amerîkayê û Komara Îslamî ya Îranê de ragihand. Serok Nêçîrvan Barzanî hêvî xwest ku ev pêngav bibe dergehek bo aştiyeke mayînde û aramiya giştî li navçeyê.

Serokê Herêma Kurdistanê, Nêçîrvan Barzanî îro, 8ê Nîsana 2026an, di peyamekê de li ser tora civakî ya “X”ê (Twitter), bal kişand ser giringiya vê agirbestê û ev xal destnîşan kirin:

Kêmkirina Rageşiyê: Ev pêşketin ji bo kêmkirina rageşiya leşkerî û parastina canê welatiyên sivîl gaveke pêwîst û stratejîk e.

Diyaloga Avaker: Agirbest dê rê li ber “diyalogeke avaker” veke da ku pirsgirêk bi rêyên dîplomatîk werin çareserkirin.

Spasiya Navbeynkaran: Serokê Herêma Kurdistanê Nêçîrvan Barzanî, spasiya hemû wan aliyan kir (bi taybetî Pakîstan) ên ku di gihîştina vê rêkeftinê de roleke navbeynkarî ya aktîf lîstine.

Serokê Herêma Kurdistanê di dawiya peyama xwe de bang li hemû aliyan kir ku bi “niyeta pak” pabendî agirbestê bin. Wî tekez kir ku karkirina ji bo “aştî, ewlehî û bextewariyê” li seranserî navçeyê, berpirsyariyeke hevpar a hemû aliyan e.