CENTCOMê li ser benderên Îranê dorpêça deryayî ragihand
Fermandariya Navendî ya Hêzên Amerîkayê (CENTCOM), bi awayekî fermî ragihand ku ji îro Duşemê, 13ê Nîsana 2026an, saet ji 17:00an pê ve, dorpêçeke deryayî ya berfireh li ser hemû benderên Îranê hatiye sepandin. Ev biryar piştî têkçûna hewildanên dîplomatîk ên li lûtkeya Pakistanê wekî gava yekem a leşkerî ya Washingtonê tê nirxandin.
Li gorî daxuyaniya fermî ya CENTCOMê, ev dorpêç hemû keştiyên bazirganî û bargiran li xwe digire ku ber bi benderên Îranê ve diçin an jî ji wan benderan derdikevin. Hat destnîşankirin ku ev biryar bêyî cudahiya ala welatan, li ser hemû keştiyên navdewletî yên ku bi Îranê re bazirganiyê dikin, dê were sepandin. Qada operasyonê hemû sînorên deryayî yên li Kendavê û Kendavê Omanê li xwe digire.
CENTCOMê di daxuyaniya xwe de tekez kir ku ev dorpêç tenê benderên Îranê dike armanc û armanca wan ne astengkirina bazirganiya gelerî ya navçeyê ye. Hêzên Amerîkayê diyar kirin ku azadiya çûnûhatina keştiyên ku ber bi benderên welatên din ên herêmê ve diçin parastî ye. Bi vê yekê, Washington peyamekê dide ku rêyên enerjiyê yên navdewletî ji bo hevkarên wan ewle ne û tenê aboriya deryayî ya Îranê hatiye hedefgirtin.
Hêzên Deryayî yên Amerîkayê bang li hemû keştiyên bazirganî yên li herêmê kir ku di dema derbasbûna ji Tengava Hurmizê û Kendavê Omanê de, hişyar bin. Hat ragihandin ku divê hemû keştî bi rêya kanala navdewletî ya “Channel 16” bi hêzên deryayî re di têkiliyê de bin û daxuyaniyên nû bi hûrî bişopînin da ku rûbirûyî tu pirsgirêkan nebin.
Ev biryara tund piştî daxuyaniyên Serok Donald Trump hat ku gefa dorpêçeke giran xwaribû, piştî ku Îranê mercên Washingtonê di lûtkeya Îslamabadê de red kirin. Pisporên siyasî hişyariyê didin ku ev pêngava leşkerî ya Amerîkayê dibe ku bibe sedema rûbirûbûneke rasterast di navbera her du welatan de û tengejariya li avên herêmê bibe astekî metirsîdar.
