Li Balekayetî mînek teqiya: Ciwanekî 18 Salî lingekî xwe ji dest da

Îro, 11ê Gulana 2026an, li devera Balekayetî rûdaneke dilsoj pêk hat. Di encama teqîna mînekê de, hemwelatiyekî ciwan birîndar bû û lingekî xwe ji dest da. Ev rûdan careke din metirsiya mînên çandî yên li deverên sînorî û zozanan derxist pêş.

Li gorî zanyariyên hatine bidestxistin, rûdan li zozanên Berdespiyan ên ser bi gundê Gunderoj ve pêk hatiye. Ciwanê bi navê Senger Arif Xalîd, ku temenê wî 18 sal e, dema ku bi armanca komkirina giyayên biharê berê xwe dabû zozanan, mînek pê de teqiya.

Yekser piştî teqînê, welatiyên li herêmê û tîmên hawarçûnê gihiştin cihê bûyerê. Ciwanê birîndar hat veguhastin bo Nexweşxaneya Çomanê. Bijîşkan ragihand ku ji ber dijwariya birînê, Senger Arif lingekî xwe ji dest daye û niha di bin çavdêriya hûr a bijîşkî de ye.

Deverên çiyayî û zozanên Balekayetî, ji ber şerên berê, bi hezaran mînên nehatine teqandin tê de hene. Her sal di werza biharê de, dema ku welatî ji bo komkirina giyayên xwarinê diçin çiyan, rûdanên bi vî rengî yên biêş diqewimin. Rayedar bang li welatiyan dikin ku li deverên gumanbar hişyar bin û nêzikî nîşanên metirsiyê nebin.