Proseyek nû di hêzên pêşmerge de: Heta Îlona 2026an hemû hêz dê bibin yek

Supasalarê Wezareta Pêşmerge, Ferîq Rukn Îsa Uzêrî ragihand ku proseya yekxistina hêzên Pêşmerge di çarçoveya reformên wezaretê de bi lez berdewam dike. Uzêrî destnîşan kir ku ev prose heta meha Îlona îsal (2026) dê bi temamî bi dawî bibe û hemû hêz di bin sîwanekî niştimanî de werin komkirin.

Supasalarê Wezareta Pêşmerge îro, 19ê Gulana 2026an, di konferansekî rojnamevanî de amar û zanyariyên nû yên derbarê birêxistinkirina hêzên pêşmerge eşkere kirin. Li gorî daxuyaniya wî, Wezareta Pêşmerge heta niha kariye 8 fîrqeyên leşkerî ava bike û di heman demê de karên birêxistinkirina Fermandariya Herêma Yekê jî bi serkeftî bi dawî bûne.

Ferîq Rukn Îsa Uzêrî bal kişand ser pabendbûna Hikûmeta Herêma Kurdistanê bi peymanên navxweyî û navdewletî û wiha got:

“Li gorî ‘Yadaştnameya Hevtêgihiştinê’, divê heta 25ê Îlona 2026an hêzeke neteweyî ya yekgirtî di bin sîwana Wezareta Pêşmerge, Hikûmeta Herêma Kurdistanê û Serokatiya Herêma Kurdistanê de were avakirin. Em pir geşbîn in ku em ê di wê dîrokê de vê proseyê bi fermî û bi serkeftî bidawî bikin.”

Derbarê pêngavên ku mane de, Supasalarê Pêşmerge diyar kir ku ew niha li benda radestkirina lîsteya navan a Fîrqeya 10 û Fermandariya Herêma Duyê ne. Hat destnîşankirin ku bi gihîştina van lîsteyan, dê hemû hêzên Pêşmerge bi fermî di bin banekî leşkerî yê yekgirtî û profesyonel de cih bigirin.

Ev pêngavên berbiçav di çarçoveya projeya çaksaziyê ya Hikûmeta Herêma Kurdistanê de tên avêtin. Armanca bingehîn a vê stratejiyê ew e ku dawî li dabeşbûna siyasî û îdarî ya hêzên çekdar were anîn û fermandariyeke leşkerî ya nûjen, niştimanî û pîşeyî li herêmê were sazûmankirin.