Civîna îro ya Parlamentoya Kurdistanê de bi amadebûna 52 parlamenteran, Desteya Serokatiya nû ya parlamentoyê hate hilbijartin. Di dengdanê de Vala Ferîd wekî Seroka Parlamentoyê, Ramî Nûrî wekî Cîgir û Muna Qehweçî jî wekî Sekreter hatin destnîşankirin.
Îro Çarşemê, 4ê Mijdara 2026an, piştî du salan li ser lidarxistina hilbijartinên giştî, Parlamentoya Kurdistanê bi beşdariya 52 parlamenteran civiya û proseya hilbijartina Desteya Serokatiyê bi dawî anî. Her sê endamên desteyê bi tevahiya dengên 52 parlamenterên amadebûyî hatin hilbijartin.
Endamên Desteya Nû ya Serokatiya Parlamentoyê
Seroka Parlamentoyê: Dr. Vala Ferîd
Vala Ferîd bi wergirtina 52 dengan wekî Seroka Parlamentoya Kurdistanê hate hilbijartin.
– Jînenîgarî: Ew di sala 1976an de li Hewlêrê ji dayik bûye.
– Xwendin û Zanist: Xwedî bawernameya doktorayê ye di beşa Yasaya Giştî de û li ser asta Zanîngeha Selahedînê xwendekara yekem bûye.
– Ezmûna Pîşeyî: Beriya niha mamosteya zanîngehê bûye, di xula çarem a Parlamentoya Kurdistanê de endam û seroka Lijneya Karûbarên Yasayî bûye. Her wiha xwedî gelek lêkolînên zanistî ye û xwedî ezmûneke berfireh a karûbarên yasayî ye li navxwe û derveyî Herêmê.
Cîgirê Serokê Parlamentoyê: Ramî Nûrî
Ramî Nûrî bi dengê tevahiya 52 endamên amadebûyî wekî Cîgirê Serokê Parlamentoyê hate pesendkirin.
– Jînenîgarî: Navê wî yê tevahî “Ramî Nûrî Odîş Daniyal” e û di sala 1985an de li Bexdayê ji dayik bûye û niştecîhê Enkawê ye.
– Ezmûna Îdarî û Civakî: Beriya niha qeymeqam û rêveberê nahiyeya Enkawê bûye. Ew parêzerê şêwirmend, nivîskar û çalakvanê civakî ye.
-Ziman: Ji bilî zimanê xwe yê zikmakî Siryanî, zimanên Kurdî, Erebî û Îngilîzî jî bi başî dizane.
Sekretera Parlamentoyê: Muna Qehweçî
Muna Qehweçî jî bi bidestxistina hemû 52 dengan wekî Sekretera Parlamentoya Kurdistanê hate diyarkirin.
– Jînenîgarî: Navê wê yê tevahî “Muna Nebî Nader Ebdullah” e; di sala 1978an de li Hewlêrê ji dayik bûye û bawernameya lîsansê di Yasayê de heye.
– Xebata Siyasî: Di tevgera siyasî û rêxistinî ya pêkhateya Tirkmen de, xwedî rola sereke ye û berê endama Encumena Bilind a Referandûmê bûye.
– Ezmûna Parlamentoyê: Muna Qehweçî ku berê mamoste û parêzer bûye, di her du xulên çarem û pêncem ên Parlamentoya Kurdistanê de wekî parlamenter, seroka fraksiyonê û sekretera parlamentoyê xizmet kiriye.
