Rêxistina PKKê ji roja ku ketîye di başûrê Kurdistanê de, ti tişt nemaye ku bi serê vê perçeya Kurdistanê neanîbe, ev nexweşiya gemar ya ku ji Bakur ve hatî, bi qasî dewletên dagirker zirar li kurdan xistiye, kurdên başûr rexmê bext reşîya xwe naçar maye, zêdebarî ser mil ragirtina zora dagirkeran, zora PKKê jî li ser milê xwe ragire.

Partîya Karkerên Kurdistanê, her roj di çapemeniya xwe de, bas li berxwedan û lehengiyê dike, qala serketinan dike, lê belê kîjan berxwedan û kîjan serketin, her kurdek dizane ku ev rêxistin hatîye di take perçeya azad a Kurdistanê de razaye û qada rast ya berxwedanê li Bakurê kurdistanê ji Tirkan re hiştîye.

Wexta mirov ji dervey çapemeniya PKKê li bûyeran mêze dike, berxwedan li holê tuneye, tenê cînayetên wehşî yên weke qetil kirina sivîlan, dagirkirin û talan kirina gundên wan, hem wext revandin, tehdîd û stendina bi zor ya bacê û stema li ser kedkar û belengazan heye, PKKe vê sitemê bi berxwedan hesab dike.

Markis di yek ji axaftinên xwe de dibêje: “ol Afyona Gela ye”, lê ji boy me kurdan di niha de PKKe bûye Afyon.

Niha kurd neçar mane zêdebarî ser mil ragirtina zora dagirkerên Kurdistanê, zora PKKê jî ser milên xwe ragirin, giraniya PKKê xistîye ser milên kurdan bi taybetî li başûr ku bi take perçeya azad ya Kurdistanê tê hesibandin, ger bi qasî giraniya dewletên dagirker zêdetir nebe bi ti awayî kêmtir nîne.

Li başûr PKKe her karekî li dijî gel dike, şêniyan ji gundên wan der dike, bacê ji wan distîne û bi cînayetên çêkirî wan dide kuştin, hin ji wan bi sûça sîxoriyê ji boy saziyên ewlehîya başûr! Hin ji wan bi sûça sîxoriyê ji boy mîta Tirka û hin ji wan jî bi cînayeta rexne kirina Apo û PKKê weke xaîn dide nasandin û kuştin.

Ti karekî gemar nemaye ku PKKê li Başûrê Kurdistanê nekiribe, lê belê, tu caran me nebihîstîye ku vê rêxistinê, tirkek, erebek yan jî farsek bi cînayeta sîxoriyê desteser kirî yan jî tehdîd kirî.

Pêgeha Darka Mazî cînayetên PKKê yên li dijî Gelê Başûrê Kurdistanê ji sala 2017 heya roja me ya îro bi belge û dukomênt kom kirine, emê di vê ÎNFOGRAFÎKÊ de, bêxin berçavan, ji bo ku gelê başûr rûyê rast yê vê rêxistinê nas bike, kanê ew bi tu awayî bi terzê DAIŞê û gropên mafyayê, sivîlan qetil dike, keç û zaroyan li pêş çavên dayik û bavên wan di şewtîne, keçan li ser rêyên dibistanê di revîne û bi dehan cînayetên din yên wehşî yên ku ev rêxistin navê berxwedanê lê dike.

Emê van cînayetan yêk bi yêk bas bikin, piştre hûn biryarê bidin, gelo ev berxwedan e weke PKKê dibêje, yan jî derdekî girane berbûye canê Kurdistanê.

Li 14 meha 1 ya îsal 2021an, hemwelatiyê bi navê “Mistefa Şefî Wesanî” ku bi mistefa Wesanî tê nas kirin û yêk ji kesatiyên dola Baleyan e û endamê komîta navçeya Qesrê ya PDKê ye, li nava erebeya xwe de şewtî tê dîtin, Mistefa di temena 60 saliyê de bû.

Malbat gomana qetil kirina wî ji PKKê dike, ji ber ku li êvara heman rojê, berpirsê asayîşa PKKê yê bi navê “Taylend” li bazgeha asayîşa gundê “Wesan” ev kes rawestandibû û jêre gotbû ku çekdarekî û hinek mazotê li gel xwe bibin çiyayê Şêx Nasr.

Rêxistina PKKê ev bûyera wehşî ku kesek bi saxî were şewtandin, li binara çiyayê Qendîlê li dola Baleyan encam dabû.

Li roja 24 meha Sibata sala 2021an, dû çekdarên PKKê li navçeya Kanî Masê bi ser mala hemwelatiyê bi navê “Mihemed Hisên” de girtin, wan jê xwest ew bi erebeya xwe cesedê gerîlayekî ku di êrîşeke hewayî ya Tirkiyê de li dorbera gundê Xankê hatibû qetil kirin, bibin navçeya Mîska, lê belê Mihemed razî nabe vî karî encam bide.

Piştre çekdarên PKKê gef lê xwarin û paş ku şere dev di nêvbera wan de çêbûy, çekdaran erebeya wî bi zorî jê stand.

Li roja 2 Sibata îsal, tîmeke wezîfedarên fermangeha elektirîkê ji boy çareser kirina elektirîk gundên “Jolê, Hîzankê û Bêlmendê” ber bi navçeya Çemankê bi rê ketin, lê belê ew ji hêla çekdarên PKKê ve hatin tehdîd kirin û çekdaran nehişt ew derbasî wan gundan bibin û karê xwe encam bidin.

Çekdarên PKKê bi matorsîklan bi dû wan ketin û jêre gotin ku nabe pîyên we careke din bikeve vê navçeyê.

Çekdarên PKKê li yekê meha Adara îsal 2021an, du gulleyên RBG ku pirî TNT kirbûn û xistibûne di nava boryeke asinî de, li ser rêya sereke ya gundê Tirwaniş danîbû.

Piştre hêzên pêşmerge û ewlehiyê yên Başûrê Kurdistanê, karîn vê hewla çepel ya PKKê ji nav bibin.

Paş ku li roja 16 çirîya paşîn ya sala 2020an rêxistina PKKê dû hemwilatiyên sivîl bi navên “Qareman Ebdulla Sofî Mîne” û “Tuwana Hacî Sofî Mîne” ji gundê Bokirîskan yê binara Qendîlê revandîn, li roja 4 meha Kanûna duyemîn ya sala 2021an, çekdarên PKKê ketin nava gund û şêniyên gund li mizgeftê kom kirin û jêre gotin ku ev herdu hemwilatiyên ku wan revandine, sîxurî kirîye.

Çekdarên PKKê ji şêniyên gund re got ku ewê danpêdanên wan belav bikin, lê ya rast PKKê ev kare weke tehdîd ji boy şêniyên gund encam daye û hêjan çarenvîsa van revandîyan nediyar e.

Du çekdarên PKKê bi rêya tunêlekê li navçeya “Gamexelê” ku dikeve rojhilata gundê “Kêste” yê ser bi Kanî Masê, çûne ber deriyê mala hemwilatî yê bi navê “Zekî Kêsteyî” ku qadroyê komîta Kanî Masê ya PDKê ye.

Çekdarên PKKê ev qadroyê PDKê û şêniyên gund bi kuştinê tehdîd kirin, bi hinceta wê yekê ku wan elektirîk ji tonêla PKKê qut kirine.

PKKê ji şêniyên gundê Kêste re gotin ku ewê hinek ji şêniyan qetil bikin.

Li roja 29 Kanûna duyemîn ya sala 2021an, çekdarên PKKê 3 hemwilatiyên parêzgehîya Duhokê bi navê “Barzanî Umer Mihemed” ji gundê Ore, “Heval Ebdulla Ehmed” ji gundê ore û “Armanc Zîyad Mihemed” ji gundê Tîlerê ku bi mebesta geryanê çûbûn navçeya Berwarî Bala, desteser kirin.

Çekdarên PKKê ev 3 hemwilatî li gel xwe birin û paş ku wêneyên wan girtin, mobaylên wan jê standin û ew tehdîd kirin.

Li roja 21 Kanûna duyemîn ya 2021an, nêzî 12 çekdarên rêxistina PKKê hatine ser rêya sereke ya çiyayê “Sada” ku dikeve sînorê bajarokê Bicêl û rê li wan hemwilatiyan girt yên ku di xwestin biçin seyranê li navçeyên berfîn.

Wan çekdarên PKKê ji hemwilatiyan xwest ku erebeyên xwe teslîm bikin ji bo ku hinek karên xwe pê encam bidin, lê belê tu yêk ji wan hemwilatiyan razî nabe erebeya xwe bi çekdarên PKKê bide, loma çekdaran nehişt tu yêk ji wan derbasî çiya bibe û hemû vegerandin Bicêlê.

Çekdarên PKKê li nêzî gundê Girî yê girêdayî navçeya Çemankê, tunêlek kolabû û ev tunel bû sedem ku li roja 22 meha Kanûna duyemîn ya sala 2021an, balefirên Tirkiyê gundê navbûrî bordoman bikin û ev êrîş bû sedema birîndar ketina 3 şêniyan, hem wext, zirar bi 4 erebeyan ket ku yên şêniyên gundê Girî bûne.

Hêjayî gotinê ye, PKKe van cînayetên ku li başûrê Kurdistanê encam dide, ji bo xwe bi berxwedan û lehengî hesab dike, berxwedana ku PKKe qala wê dike, ew lehengî ye ya ku rêxistin li ser serê gelê belengazê başûr diyar dike.